Gazeta Si – Sfida e madhe mes dy sportistëve të pathyeshëm ka përfunduar me fitoren e “Bud”, që tashmë ka unifikuar të gjithë gjerdanët e kategorisë.
Terence Crawford është kampioni i parë i boksit që ia ka dalë të unifikojë të gjithë gjerdanët botërorë të peshave ‘welter’ që kur ekzistojnë siglat kryesore (WBA, WBO, IBF). Ai është boksieri më i mirë ‘pund for pound’ (mes të gjitha kategorive) në qarkullim. Një fenomen i vërtetë.
E ka certifikuar të tillë ndeshja e vitit, për shumë edhe ndeshja e 10-vjeçarit. Crawford triumfoi në ringun e Las Vegasit me ‘ko’ teknik në raundin e 9-të kundër Errol Spence Jr. Një sfidë epokale, mes dy boksierësh ta pathyeshëm: 67 fitore dhe 0 humbje rekordi impresionues i tyre. Krahasohen me Sugar Ray Leonard dhe Thomas Hearns në 1981-shin, apo Floyd Mayweather dhe Manny Pacquiao në 2015-ën. Më e mira që mund të ofrojë sot boksi.
Në ‘T Mobile Arena’, me 20.000 vende dhe çmime biletash nga 340 në 12.500 dollarë, Crawford hyri i shoqëruar nga “Lose yourself” i Eminem. Në ring ai ‘pikturoi’ kryeveprën e një karriere me 40 fitore dhe 31 ‘ko’. Pritej një duel i ekuilibruar, por 35-vjeçari nga Omaha, Nebraska, i mbiquajtur “Bud”, 1.73 m për 66.82 kilogramë, nuk i dha asnjë shans kundërshtarit.
Ai fitoi çdo raund praktikisht. E hodhi kundërshtarin në tapet fillimisht në raundin e 2-të, dy herë në raundin e 7-të dhe e mbylli në të 9-in, kur arbitri Harvey Dock sinjalizoi fundin dhe triumfin e Crawford. Spence, 1.77 m për 66.59 kilogramë, ishte i gjakosur dhe i enjtur nga goditjet e rivalit. Ai është mundur pas 28 takimesh, 22 me k.o. Emri i betejës, “The truth”, këtë herë doli i kundërt, sepse ‘e vërteta’ ishte Crawford.
Kampioni e mundi rivalin, falë shpejtësisë dhe me zgjedhjen e kohës, duke gjetur shënjestrën në mënyra të ndryshme dhe me goditje të rënda. “Ishtë më i miri sot, nuk ka justifikime”, – pranoi me ndërshmëri Spence pas ndeshjes. “Besoj se kam treguar sërish forcën dhe madhështinë time, tregova kush jam”, – u shpreh Crawford.
Për të është ndeshja e 18-të si kampion në karrierë. Është kampion bote që prej 2014-ës. Kishte unifikuar për hërë të parë në 2017-ën titullin e peshave super të lehta, tani e ka bërë për herë të parë në peshat ‘welter’.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
