.png)
Kompanitë amerikane “Pfizer” dhe “BioNTech”, kanë njoftuar se po zhvillojnë një version të përditësuar të vaksinës anti-Covid që sulmon variantin “Delta”, një lloj shumë ngjitës tani i përhapur në të gjithë botën. Kompanitë farmaceutike po planifikojnë të fillojnë provat klinike të vaksinës në gusht.
Megjithatë, rregullatorët shëndetësorë të SHBA-ve, FDA dhe CDC, janë shprehur se një dozë e radhës nuk është e nevojshme për momentin.
Doza e tretë rrit antitrupat 5-10 herë
Ndërkohë, të dyja kompanitë kanë deklaruar se një dozë e tretë e vaksinës së tyre aktuale me dy doza, është e dobishme për ruajtjen e niveleve të larta të antitrupave kundër të gjitha varianteve të njohura aktualisht, përfshirë “Delta”-n.
Pikërisht për këtë, kompanitë farmaceutike amerikane synojnë t’i kërkojë EMA-s dhe FDA-së, autoritetet respektive në Europë dhe SHBA, dritë jeshile për dozën e tretë të vaksinës së saj. Provat klinike për administrimin e një doze të tretë të vaksinës, kanë treguar në fakt të dhëna fillestare "inkurajuese".
Sipas asaj që doli nga studimi, një injeksion i tretë rrit nivelin e antitrupave 5 deri në 10 herë kundër llojit origjinal dhe variantit “Beta”, krahasuar me dy dozat e para.
Të dhënat nuk janë ende të disponueshme, por “Pfizer” synon të publikojë të dhëna më përfundimtare gjithashtu në një revistë të vlerësuar nga kolegët.
Sidoqoftë, Administrata e Ushqimit dhe Barnave, në një shënim të përbashkët me Qendrat për Sëmundje dhe Kontroll (CDC), deklaroi se "amerikanët plotësisht të vaksinuar, nuk kanë nevojë për një dozë përforcuese tani", duke theksuar se nuk varet nga vetë kompanitë për të vendosur nëse dhe kur do të jetë e nevojshme tërheqja.
“Ne vazhdojmë të rishikojmë të gjitha të dhënat e reja, pasi ato bëhen të disponueshme dhe do ta mbajmë publikun të informuar. Ne jemi të përgatitur për doza përforcuese nëse dhe kur shkenca vërteton se janë të nevojshme”, - thuhet në shënim.
Pas 6 muajsh, efektiviteti i vaksinës bie
“Pfizer” sqaroi gjithashtu se 6 muaj pas vaksinimit, efektiviteti i vaksinës bie, edhe pse është ende i mjaftueshëm për të parandaluar sëmundjen në format e saj më të rënda. Mikael Dolsten, zyrtari kryesor shkencor i “Pfizer”, tha se rënia e raportuar së fundmi në efikasitetin e vaksinës në Izrael, ishte kryesisht për shkak të infeksioneve tek njerëzit që u vaksinuan në janar ose shkurt.
"Ndoshta, - shpjegoi Dolsten, - ekziston rreziku i ri-infektimit, sepse antitrupat, siç pritej, ulen". Izraeli, një vend laboratorik për “Pfizer”, sapo ka njoftuar se ka parë efektivitetin e vaksinës “Pfizer” që bie nga 90 në 64% me zgjerimin e variantit “Delta”.
Albert Bourla, shefi ekzekutiv i “Pfizer”-it, shtoi se "njerëzit ka të ngjarë të kenë nevojë për një dozë përforcuese të vaksinës Covid-19 çdo 12 muaj dhe se kompania po zhvillon një version të përditësuar të vaksinës që merr të gjithë proteinën ‘Spike’ të variantit ‘Delta’”.
Jo vetëm antitrupa: kujtesë imunologjike
Sidoqoftë, duhet përsëritur që antitrupat janë vetëm pjesë e përgjigjes imune të trupit dhe se është normale që ato të zvogëlohen me kalimin e kohës nëse nuk ka më kontakt me virusin.
Ajo që vlen shumë, është ajo që quhet "memorie imunologjike", pra prania e limfociteve T, të cilat stimulojnë prodhimin e antitrupave kundër Sars-CoV-2 kur ata hasin virusin. Disa studime, kanë treguar se rreth dy herë më shumë njerëz kanë zhvilluar imunitet të qelizave T, krahasuar me ato prej të cilave ne jemi në gjendje të zbulojmë antitrupa "klasikë" me teste serologjike.
Testet që matin përgjigjen e limfociteve T, duhet të jenë gati deri në vjeshtë (aktualisht kërkohen teste komplekse laboratorike) dhe atëherë do të jetë e mundur të kuptohet nëse edhe ata që mund të kenë pak antitrupa, akoma mbajnë një përgjigje efektive me memorie imunologjike.
Praktika e dozës së tretë
Çfarë do të thotë në praktikë të kesh një dozë të tretë të vaksinës? Tani për tani, i njëjti përbërës është në përdorim, por në të ardhmen duhet një dozë e radhës ‘ad hoc’ kundër “Delta”-s.
Autorizimi i FDA-së (amerikane) ose EMA-s (europiane), do të ishte vetëm një hap i parë. Nuk do të thotë aspak që popullatës, automatikisht do t’i ofrohet një dozë e re edhe për shkak se një pjesë e madhe e njerëzve në Perëndim nuk e ka përfunduar as ciklin e vaksinimit, për të mos përmendur zonat më të varfra të botës, që nuk kanë parë akoma një vaksinë.
Në fund të fundit, do të varet nga autoritetet shëndetësore të shteteve individuale, për të vendosur nëse dhe kush do të ketë nevojë për dozën e tretë.
Është e mundur që një dozë e re do t'i ofrohet asaj kategorie të popullatës që është më e rrezikuar nga sëmundjet serioze: të moshuarve, pacientëve me imunosupresion, të cilët zhvillojnë pak antitrupa dhe njerëzve me patologji të mëparshme.
Mbi të gjitha, Franca tashmë po e bën këtë me kategori të caktuara të pacientëve. Që nga prilli, punonjësit e kujdesit shëndetësor në Francë, kanë administruar rregullisht një dozë të tretë të një vaksine me dy doza për pacientë me probleme shëndetësore, që zhvillojnë pak antitrupa për shkak të gjendjes së tyre.
Në një studim të kryer nga studiuesit francezë, u zbulua se marrësit e transplantit të organeve, panë që nivelet e antitrupave të tyre u rritën në 68% pas dozës së tretë krahasuar me 40% pas së dytës.
Përshtati: Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
