.png)
Nga Gazeta ‘SI’ – Shqipëria ka miratuar një ligj të ri që synon të ndalojë hyrjen dhe qarkullimin e produkteve që imitojnë markat e njohura luksoze si Louis Vuitton, Dior, Prada apo Dolce & Gabbana. Qëllimi i ligjit është mbrojtja e markave tregtare dhe ndalimi i mallrave që shkelin të drejtat e pronësisë intelektuale.
Por a do të funksionojë realisht?
Sipas ligjit të ri, çdo produkt i falsifikuar do të ndalohet në pikat doganore dhe pronarët e markave do të kenë të drejtë të kërkojnë dëmshpërblim, të nisin hetime dhe të ndjekin ligjërisht çdo shkelje.
Megjithatë, praktika në terren tregon se tregu shqiptar vazhdon të jetë i mbushur me “imitime të para” — sidomos online, në rrjete sociale dhe dyqane që shesin produkte luksoze me çmime të ulëta.
Ligji lejon qytetarët të sjellin mallra për përdorim personal brenda kufijve duty free, por kjo hap derën për interpretime të lira dhe shpesh të keqpërdorura. A mundet vërtet autoritetet të kontrollojnë çdo valixhe apo porosi online?
Dogana raportoi bllokimin e mbi 40 mijë produkteve false gjatë vitit 2024, por shifrat janë vetëm një pjesë e vogël krahasuar me përhapjen masive të këtij fenomeni në vend.
Ligji është një hap pozitiv në letër. Por sfida e vërtetë është zbatimi. Pa kontrolle efektive, ndëshkime reale dhe vullnet institucional, Shqipëria rrezikon të mbetet një “kopje e lirë” e vetes, ndërsa tregu i produkteve false lulëzon pa pengesë.
.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
