Natën e 8 Dhjetorit energjia elektrike në Qytetin Studenti mungonte. Por, pikërisht nga kjo errësirë u ndez drita e shpresës për shqiptarët. Mungesa ndriçimit artificial ishte thjesht preteksti, qëllimi ishte tjetër.
Siç kanë treguar më vonë protagonistët e atyre ditëve, studentët nuk u ngritën me parrullën “Duam drita”, por kërkuan “Shqipërinë si e gjithë Europa”.
Nismëtarët ishin rreth 300, fillimisht, por brenda pak orësh u shumëfishuan dhe nisën marshimin nga Qyteti Studenti drejt qendrës së Tiranës. Forcat e regjimit komunist kishin marrë urdhër që t’i bllokonin para se të dilnin tek “Rruga e Elbasanit”, që në atë kohë mbante emrin “Rruga Labinot”, në nder të fshatit që ndodhet në rrethin e Elbasanit, e ku komunistët zhvilluan një konferencë gjatë Luftës së Dytë Botërore.
Fillimisht ja dolën mbanë, por fitorja ishte vetëm e një beteje të vogël. Nga 9 dhjetori e në vazhdim studentët përshkallëzuan protestën dhe i dërguan një letër Ramiz Alisë me pikë kryesore pluralizimin politik.
Përballë revoltës që nuk ishte më vetëm studentore, por u shndërrua në popullore, Ramiz Alia pranoi kërkesat e tyre, që i hapën rrugë mbajtjes së zgjedhjeve të para pluraliste në vitin 1991 dhe të 1992 që rrëzuan përfundimisht komunizmin. Pjesa pasuese e historisë pas këtyre ngjarjeve dhe se sa është realizuar thirrja studentore e atyre viteve për “Shqipërinë si gjithë Europa”, dihet…
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
