.png)
Pa zhurmën e zyrës, njerëzit për të biseduar dhe diskutimet me çdo njeri, shumë nga ne tani po i kalojmë ditët qetë, pa folur me të tjerët, pasi puna po bëhet nga shtëpia. Por vetëm sepse nuk po flasim me njerëz të tjerë aq shpesh sa dikur, nuk do të thotë që nuk po flasim fare. Në fakt, biseda me veten tonë ose monologu i brendshëm siç quhet shpesh është ende aq aktiv (dhe i rëndësishëm) si kurrë më parë. Nëse nuk e keni hasur kurrë më parë konceptin e ‘bisedes me veten’, në thelb janë të gjitha mesazhet që i dërgojmë vetes përmes një dialogu të brendshëm.
Pse vazhdoj të flas me veten time? Çfarë do të thotë me të vërtetë dhe kur duhet të shqetësoheni?.
Për shembull, ju mund të përfshiheni në biseda vetiake negative kur përballeni me një detyrë veçanërisht sfiduese duke i thënë vetes se nuk jeni “mjaft të mirë” ose “nuk jeni në gjendje ta përballoni”. Nga ana tjetër, ju mund të ktheheni te vetë-biseda pozitive për të ngushëlluar veten në një situatë të ndërlikuar, ndoshta duke i thënë vetes “ti mund ta bësh këtë” ose “gjithçka që bën është më e mira”.
Megjithëse shumë biseda me veten kanë tendencë të jenë të pavetëdijshme, ka mënyra se si mund të ‘shfrytëzojmë’ bisedën me veten tonë për të rritur qëndrueshmërinë tonë emocionale dhe për të ndihmuar veten të mposhtim streset e përditshme që mund të hasim.
Në fakt, sipas një studimi të ri, të kryer nga psikologë në Universitetin e Miçiganit, bisedat me veten, kur përdorim vetën e dytë ose të tretë për tu distancuar nga situata stresuese me të cilën po përballemi mund të na ndihmojë të përballojmë më mirë situatat stresuese ose emocionale.
Studimi zbuloi se, pa marrë parasysh intensitetin e përvojës negative ose sfiduese, biseda me veten por e distancuar mund të zvogëlojë reagimin emocional, për shembull, shkalla në të cilën emocionet tuaja kontrollojnë reagimin tuaj ndaj një situate, krahasuar me pjesën racionale të trurit tuaj. Në këtë mënyrë, biseda me veten mund të na ndihmojë të rregullojmë më mirë emocionet tona në situata stresuese, një rezultat i cili mund të na ndihmojë të zvogëlojmë sasinë e stresit që ndiejmë dhe t’i përgjigjemi në një mënyrë më të dobishme dhe produktive. Pra, si mund ta përdorim vetëbisedimin e distancuar për t’iu përgjigjur më mirë situatave stresuese në punë?
Siç përshkruan psikologu Noam Shpancer “Në terma të thjeshtë, teknika përfshin reflektimin mbi përvojën tuaj stresuese nga një perspektivë e jashtme”.
Në vend që të përdorni vetën e parë ‘Unë’ në monologun tuaj të brendshëm, ju mund të përdorni emrin tuaj, vetën e dytë të numrit shumës ‘ju’ apo vetën e tretë të numrit njëjës ‘ai/ajo’.
“Për shembull, le të supozojmë se po përballem me një problem, ose po reflektoj në një situatë stresuese emocionale që kam provuar. Në vend që të mendoj, ‘Si do ta zgjidh këtë problem?’ Ose, ‘Si po ndihem për atë që ndodhi?’ Unë mund të pyes veten ‘Si do ta zgjidhë Noam këtë problem?’ Ose ‘Si po ndihet Noam për atë që ndodhi?'” tregon ai.
Siç theksojnë fjalët e Noam, duke u bërë më të vetëdijshëm për mënyrën se si flasim me veten dhe duke formuar mesazhet që dërgojmë për të distancuar veten nga situata, ne mund ta vendosim veten në një pozitë më të mirë për të përballuar momentet stresuese në ditët tona. Në të vërtetë, në vend që të lehtësojë stresin që tashmë ekziston, biseda me vete mund të na ndihmojë të shmangim stresin. Pra, herën tjetër që do të përballeni me një situatë stresuese, pse të mos përdorni këtë teknike të thjeshtë? Jo vetëm që është super e lehtë për tu bërë, por mund të ju ndihmojë të kontrolloni më shumë emocionet tuaja.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
