Bullgaria ka dhënë sot dritën jeshile për hapjen e negociatave me Shqipërinë dhe Maqedoninë e Veriut.
Nëpërmjet një deklarate, Sofja jep miratimin e saj duke kërkuar garantimin maksimal të së drejtës së pakicës kombëtare bullgare në vendin tonë. Ajo kërkon nëpërmjet kësaj deklarate studimin e gjuhës letrare bullgare si gjuhë amtare në rajonet ku jeton kjo pakicë, përkatësisht në Gollobordë, Gora, Prespë, Korçë, Elbasan, Kukës.
Bullgaria kërkon gjithashtu dhe llogaritjen e popullatës sipas standardeve evropiane në mënyrë që të pasqyrojë në mënyrë objektive përkatësinë etnike.
“Mbi këtë bazë dhe në këto kushte Asambleja Kombëtare e Bullgarisë mbështet negociatat para pranimit për anëtarësimin në BE të Republikës së Maqedonisë Veriore dhe Republikës së Shqipërisë”, thuhet në projekt- deklaratë.
Po ashtu këtë dokument, Sofja i bën thirrje Shkupit që të zbatojë në mënyrë efektive dhe pa vonesë vullnetin e mirë për të zbatuar Marrëveshjen për Miqësi, Fqinjësi dhe Bashkëpunim të nënshkruar nga kryeministrat Boyko Borisov dhe Zoran Zaev më 1 gusht 2017.
“Bullgaria kërkon të kuptojë të vërtetën historike për historinë tonë të përbashkët, të cilën e ndajnë të dy kombet tona … Të përmbahemi në atë që është rënë dakord në punën e Komitetit të Përbashkët Multidisiplinar të Ekspertëve për çështjet Historike dhe Edukative”, thuhet në dokument.
Draft-deklarata kërkon të ndalojë të gjitha format e gjuhës së urrejtjes ndaj Bullgarisë dhe qytetarëve të Maqedonisë Veriore me vetëdije bullgare, përfshirë në media, monumente, pllaka përkujtimore etj.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
