Pas ngjarjeve dhe thirrjeve raciste në Bularat të shfaqura gjatë procesit të varrimit të Kostandin Kaçifas, Shqipëria shpall si person të padëshirueshëm eurodeputeten qipriote, Eleni Theocarus për nxitje të urrejtjes dhe pretendimeve territoriale.
Vendimi u shpall nga Ministria përEuropën dhe Punët e Jashtme nëpërmjet këshilltarit për Rajonin, Glevin Dervishi, i cili ka bërë publik vendimin e marrë për eurodeputeten.
“Në mbrojte rendit kushtetues, sigurisë kombëtare, qetësisë publike dhe pacenueshmërisë në asnjë lloj forme të tërësisë territoriale të Republikës së Shqipërisë, autoritetet shqiptare janë mbështetur në mekanizma tërësisht ligjor për adresimin e problematikës së kësaj situate. Në bashkëveprim ndërinstitucional dhe pas vlerësimit të kryer nga institucionet e specializuara, Ministria për Evropën dhe Punët e Jashtme i propozoi Ministrisë së Brendshme shpalljen non grata (person i padëshirueshëm në Shqipëri) të eurodeputetes qipriote Eleni Theocharous. Ministria e Brendshme referuar statusit politiko-diplomatik dhe angazhimit të saj në Parlamentin Evropian, pas vlerësimit dhe në mbështetje të propozimit të MEPJ, gjykuar në materialet referuese të administruara nga Ministria e Brendshme vendosi të miratojë kërkesën e MEPJ”, deklaroi Dervishi.
Këshilltari për Rajonin në MEPJ, Glevin Dervishi
Ndërsa bëri të ditur se “ky vendim vjen si reagim i detyruar kushtetues e ligjor i institucioneve të Republikës së Shqipërisë, ndaj shfaqjeve të përsëritura ekstremiste të eurodeputetes Eleni Theocharous. Prononcimet e saj që nxisin urrejtjen, cenimin e rendit kushtetues të vendit tonë, ngritjen e pretendimeve territoriale ndaj Republikës së Shqipërisë, nuk do të mund të bëhen më në tokën shqiptare”.
Mbështetur në procedurat diplomatike dhe konsullore, Ministria për Evropën dhe Punët e Jashtme e Shqipërisë do të përcjellë nëpërmjet kanaleve diplomatike vendimin për të ndaluar hyrjen e mëtejshme në Shqipëri, të eurodeputetes.
“Qeveria e Republikës së Shqipërisë është e vendosur për të kontribuar vijimësisht për stabilitetin rajonal, për të bashkëpunuar ngushtësisht me fqinjët e partnerët ndërkombëtar, por është po ashtu e vendosur të mos tolerojë, për asnjë arsye shfaqje sfiduese ndaj rendit kushtetues, thirrje cenuese për tërësinë territoriale dhe akte dëmtuese të harmonisë mes qytetarëve të Republikës së Shqipërisë. Greqia mike e populli i saj janë një aset shumë i vyer në kapitalin e miqësive tradicionale të Shqipërisë e të popullit shqiptar. Elemente apo grupe ekstremiste që në greqisht apo edhe në shqip, flasin një gjuhë të përbashkët urrejtjeje e përçarjeje, e cila nuk ka lidhje me gjuhën europiane që bashkon popujt e shtetet tona, s’do të kenë asnjë shans të minojnë rrugën tonë të përbashkët të paqes e të bashkëpunimit strategjik në funksion të së ardhmes që meritojnë fëmijët e sotëm të Shqipërisë e të Greqisë”, theksoi Dervishi.
Ky është vendimi i dytë i qeverisë shqiptare, pas asaj që mori për shpalljen “non grata” të 52 shtetasve grekë. Për vlerësimin e Ministrisë së Jashtme, shfaqja e orkestruar si një provokim agresiv në Bularat, e cila e ktheu një ceremoni mortore në një manifestim sfidues ndaj rendit kushtetues, sigurisë e qetësisë publike të Republikës së Shqipërisë. “Me thirrje ekstremiste, nxitje të urrejtjes dhe thirrje për përçarje mes qytetarëve shqiptarë me kombësi shqiptare e greke, ishte e papranueshme për shtetin e për shoqërinë shqiptare e cila është një shoqëri e bashkëjetesës demokratike, ku minoritetet janë të mbrojtura me një ligj të standardeve më të larta evropiane dhe ku minoriteti grek është një pasuri e një urë e pazëvendësueshme fqinjësie të mirë me Greqinë mike”, thekson Dervishi.
Gjatë vizitës në Bularat në ceremoninë e varrimit të Kaçifas, eurodeputetja qipriote deklaroi se “E konsideroi detyrim moral të ngrejë çështjen Kacifas si dhe të shkeljes së të drejtave të minoritarëve të zonës ne përgjithësi. Mund të arrestohej, por u vra. Ai u ekzekutua nga policia shqiptare, ndërkohë që nëse donte kishte mundësi dhe aftësi”
Lidhur me deklaratat e kryeministrit Edi Rama për ngjarjen, eurodeputetja Theoharis është shprehur: “Le te jetë kryeministri i korrupsionit që e konsideron ‘ekstremist të marrë’ e jo Athina. Kam detyrim moral te hap çështjen e shkeljes së te drejtave dhe vrasjes së Kacifa në Parlamentin Europian”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
