.png)
Gazeta Si – Starton Botërori i Atletikës. Jo pak, por 36 nga 44 kampionët individualë të ‘Eugene 2022’ do të garojnë edhe në Budapest, në stadiumin pranë Danubit, ku për 9 ditë nga sot spektakli do të jetë i garantuar. Yjet janë të shumtë.
E vërteta është se pasardhësi i Usain Bolt nuk është gjetur ende (nëse do të gjendet ndonjëherë), por është po ashtu e vërtetë se kampionët e prestigjit në Botërorin e Hungarisë nuk mungojnë. Për ta nisur nga femrat, jo thjesht për të qenë kavalierë, spikat Shelly-Ann Fraser, xhamajkiania ‘vetëtimë’ që në moshën 36-vjeçare, me 152 centimetrat e saj, kërkon suksesin e 6-të në 100 metrave (në 8 edicione, i pari në Berlin 2009).
Specialistja e shpejtësisë, apo siç e thërrasin ‘Mommy rocket’, ka fituar edhe 2 medalje ari, 1 argjendi dhe 1 bronzi në Olimpiada. Nënë prej 6 vitesh, ajo ka bërë historinë: askush në nivel individual nuk ka fituar më shumë se 4 medalje ari botërore. Tani synon të bëhet legjendë dhe nëse ia del, do të barazonte mitikun Sergei Bubka, 6 herë radhazi kampion në kërcimin me shkop.
Shelly-Ann nuk është e vetmja që mund të imitojë Bubkën. Është edhe 34-vjeçari Pavel Fajdek, lavdia e Polonisë, që në hedhje çekiçi fiton pa ndërprerje që nga Moska 2013. Mutaz Basrjim në kërcim së larti kërkon medaljen e 4-t radhazi.
Pastaj është edhe Armand Duplantis që në kërcimin me shkop kërkon rekordin e radhës. Sportisti 23-vjeçar suedez ka shansin ideal në Budapest për të përmirësuar rekordin e tij.
Në garën e 1500 metrave për meshkuj e gjithë vëmendja do të jetë te norvegjezi Jakob Ingebrigtsen. Karsten Warholm, mbreti i 400 metrave me pengesa, pritet të dhurojë sërish spektakël.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
