Bota po ‘çmendet’ për ar

Nga Gazeta 'Si'- Frika e investitorëve se po humbasin mundësitë, ka nxitur një kërkesë për arin.

Kërkesa globale kaloi 100 mld dollarë për herë të parë në tre muajt e fundit, sipas të dhënave nga Këshilli Botëror i Arit.

Ky interes ka nxitur një rritje 34% për metalin e verdhë vetëm gjatë këtij viti, pavarësisht shqetësimeve për luftën në Ukrainë, Lindjen e Mesme apo normat e interesit. Të mërkurën, çmimi i arit në bursë ishte mbi 3.000 dollarë për onz.

“Investitorët profesionalë dhe institucionalë po vuajnë nga “paniku i humbjes së rastit”, pasi ari po prek ccmime shumë të larta”, thotë Këshilli në raportin e fundit.

Familjet dhe individët e pasur kanë blerë më shumë ar në muajt e fundit për shkak të shqetësimeve rreth niveleve të borxhit të qeverisë, veçanërisht në SHBA, sipas ekspertit të Këshillit, John Reade.

“Familjet priren të mendojnë në horizonte më të gjata kohore sesa investitorët me pakicë. Ata mendojnë për mbrojtjen e pasurisë së brezave, nipërit dhe mbesat – dhe janë bërë vërtet të shqetësuar për nivelet e borxhit, veçanërisht në SHBA,” tha ai.

Megjithatë, bankat qendrore ngadalësuan blerjet e tyre të arit gjatë fundit të verës, me blerjet që ranë 49% nga viti në vit në 186 ton, niveli më i ulët tremujor në dy vjet. Rritja e mprehtë e çmimeve të arit që nga marsi kishte penguar blerjen nga bankat qendrore, raporton Këshilli.

Ndërsa qeveritë perëndimore ulin normat e interesit, kjo pritet të vazhdojë të mbështesë çmimet e arit. Një aktiv që nuk jep rendiment, ari zakonisht përfiton nga norma më të ulëta sepse kostoja oportune e mbajtjes së tij është më e ulët.

Kërkesa për bizhuteri është ulur nga çmimet e larta të arit, me konsumin global që ra 7% në tremujor krahasuar me një vit më parë, sipas Këshillit. Bizhuteritë përfaqësojnë rreth 40% të kërkesës globale për arin.

“Niveli absolut i çmimeve është mjaft i habitshëm për dikë që e ndjek ecurinë e arit për një kohë të gjatë”, tha Reade. "Kërkesa për bizhuteri po ndikohet."/FinancialTimes

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.