Nga Gazeta ‘SI’ – Shqetësimit të blegtorëve që protestuan në rrugën Kardhiq-Delvinë për uljen e çmimit të qumështit, ministrja e Bujqësisë Anila Denaj, i dha përgjigje nga salla e një hoteli në Tiranë.
Ministrja këmbënguli se “vetëm me rregulla të qarta loje të një ekonomie tregu, mund të ecim përpara”, por blegtorëve u tha të “gjejnë gjuhën e përbashkët” me kompanitë përpunuese të qumështit.
Dëshmitë e blegtorëve që mbushën rrugët e jugut dhe shifrat zyrtare tregojnë se as dialogu e as tavolinat nuk mund të ringjallin këtë industri që ka nevojë për politika fiskale stimuluese.
Heqja e TVSH-së për qumështin e importuar një vit më parë, ishte një masë e qeverisë që goditi drejtpërdrejtë prodhimin vendas dhe stimuloi atë të importit. Në të njëjtën periudhë qeveria tentoi të taksojë qumështin pluhur me 100 lekë/litër, kompanitë e bulmetit e kundërshtuan fuqishëm dhe drafti nuk arriti kurrë në Kuvend.
Nga ana tjetër, zhvlerësimi i euros dhe pse shumë larg deleve e lopëve, favorizoi produktet e huaja, duke ulur kostot për kompanitë dhe rritur fitimet.
Edhe shifrat e INSTAT raportojnë një rënie të lirë të blegtorisë që nga 2020-a, me një reduktim të ndjeshëm të krerëve dhe tonëve të qumështit të prodhuar. Në 2022-shin qumështi i prodhuar në vend ra në 970 mijë tonë, kur më herët rezultonte gjithmonë mbi 1 mln.
Për blegtorët, nuk mund të ketë dialog me kompanitë që i trajtojnë si skllevër dhe vënë në rrezik dhe mbijetesën e tyre me çmimet e ulëta. Vetë qeveria sipas tyre, ka njësoj faj për rrënimin e blegtorisë duke mos reaguar dhe duke qëndruar “në zyrat luksoze që i kanë mobiluar me paratë që BE-ja jep për fermerët”.
Dialogu dhe komunikimi midis palëve, nuk zgjidh asnjë nga ngërçet e lartpërmendura, kur qindra blegtorë po luftojnë për mbijetesë, me sytë përtej kufirit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
