Në përfundim të Panairit të 22-të të Librit në Tiranë këtë të shtunë u ndanë edhe çmimet për autorët dhe shtëpitë botuese që morrën pjesë.
Autori më i mirë i vitit 2019 u shpall Besnik Mustafaj. Shkrimtari u vlerësua për romanin “Dëmtuar gjatë rrugës”. Motivacioni që e shoqëroi këtë çmim ishte ky: Për përshkrimin plot realizëm dhe ironi të hollë të një periudhe dramatike, ende të pranishme dhe të gjallë në mendjet e njerëzve, ravijëzimin plot ritëm poetik, estetik dhe të besueshëm të personazheve dhe rrëfimin transparent të zvetënimit të individit në një shoqëri totalitare.
Ndërkohë përkthyesi më i mirë i vitit 2019 u shpall Korab Hoxha për përkthimin e “Tetori në vagon”. Libri me poezi, ese dhe prozë të shkurtër është i autores ruse Marina Cvetajeva,
Në Panairin e Librit, u vlerësua si autori më i mirë i prozës memorialistike, Lekë Tasi me librin e tij “Grabjani rrëzë kodrave”
Çmimi i Ambasadës së Francës për përkthimin më cilësor iu dha Shtëpisë botuese “Dituria” për shqipërimin e librit “Lehtësia e padurueshme e qenies” të Milan Kunderës. “Për promovimin e letërsisë më të mirë bashkëkohore franceze, përmes sjelljes në një shqipe të pastër e të thellë të librit më të rëndësishëm të Kunderës, me karakter sa universal aq edhe historik. Në këtë përkthim, thjeshtësia ngrihet në abstraksion dhe interpretimi i tekstit si çelës i suksesit të përkthimit të mirë, është arritur maksimalisht. Me këtë rast, lexuesit shqiptarë mund ta shijojnë përkthimin po aq sa edhe origjinalin”, thuhet në motivacionin që shoqëroi këtë çmim që u dha nga ambasada franceze këtu në Tiranë.
Juria e përbërë nga 5 anëtarë: Lili Sula, pedagoge në UT, Shefe e Departamentit të Letërsisë (Kryetare e Jurisë), Agim Baçi – kritik letrar, Parid Teferiçi – përkthyes, Adriatike Lami – shkrimtare dhe Agim Doksani – përkthyes, për afro 3 muaj është mbledhur për të përzgjedhur veprat më të mira.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
