Ministrja e Arsimit, Besa Shahini ka përgënjeshtruar si të rremë një lajm të shpërndarë nëpër mediat sociale se mësimi në qarqet Tiranë dhe Durrës nuk do të fillojë para datës 9 dhjetor.
Ministrja ka reaguar duke deklaruar se mësimi në këto dy qarqe mbetet i pezulluar pa afat dhe se ende nuk ka një vendim zyrtar se kur mund të fillojë procesi i mësimdhënies. Ajo thotë se mësimi do të rifillojë vetëm pas verifikimit të sigurisë teknike të shkollave.
“Nxënës, prindër dhe mësues të dashur! Njoftimin zyrtar për rifillimin e mësimit do ta bëj pasi të mbyllim të gjithë analizat e vlerësimeve të infrastrukturave shkollore”, deklaron ministrja Besa Shahini.
Reagimi i ministres u nxit pas shpërndarjes së një statusi nga një profil i rremë me emrin e saj në Facebook, ku hamendësohej se mësimi nuk do të fillojë para datës 9 dhjetor.
“MOS MERRNI në konsideratë LAJMET “FAKE” si kjo këtu! Njoftimet e mia i publikoj tek kjo faqe dhe ato pastaj përcillen edhe në kanalet e ndryshme mediatike”, saktëson Shahini.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
