Nga Gazeta ‘SI’ – Formalizimi dhe digjitalizimi i sektorëve ekonomikë janë fushat ku duhet të fokusohet reforma fiskale e Shqipërisë, sipas kreut të strategjisë dhe politikave në BERZH, Christoph Denk.
Në një përgjigje për Gazetasi.al, Denk tha se problemi më i madh i ekonomisë shqiptare është informaliteti që lidhet drejtëpërdrejt me mirëqeverisjen. “Pas formalizimit, digjitalizimi është sfida më e madhe për Shqipërinë. Mendoj se rruga e integrimit në BE do të ndihmojë për këto. Ekonomia duhet të jetë konkurruese, e mirëqeverisur dhe elastike”, – u përgjigj Dank.
Ai përmendi si pengesë për zhvillimin ekonomik të Shqipërisë edhe problemet në certifikimin e eksportuesve, ndonëse vendi ka potenciale për të qenë një eksportues i madh “ka problem me dokumentat”.
Dank sugjeroi dhe rritje të elasticitetit dhe diversifikimit të sektorit energjitik në Shqipëri, duke mos qenë i varur vetëm nga burimet hidrike në kushtet e ndryshimeve klimatike.
Në raportin e tranzicionit 2022-2023, BERZH e cilëson Shqipërinë si vendin me progresin më të vogël në reformat strukturore
Shqipëria ka pikëzimin më të vogël në matësin e “elasticitetit” ku përfshihet siguria energjetike dhe stabiliteti financiar duke mbetur e fundit në rajon.
Pikët më të larta për Shqipërinë, janë në treguesin e “integrimit”, ku përfshihet përthithja e investimeve të huaja, diversifikimi i portofolit të investimeve.
Në “konkurrencë” e cila mat efektivitetin e tregut të punës, prodhimtarinë dhe shërbimet, Shqipëria rezulton përsëri e fundit në rajon.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
