Nga Gazeta ‘Si’- Miliarderi amerikan Elon Musk po përpiqet të ndikojë në zgjedhjet gjermane të planifikuara për 23 shkurt. Kështu është shprehur një zëdhënëse e qeverisë gjermanë, teksa kritikonte CEO-n e Teslas.
“Është me të vërtetë rasti që Elon Musk po përpiqet të ndikojë në zgjedhjet federale”, shkroi ajo në një postim në platformën ‘X’, teksa kritikoi një artikull opinioni që Musk shkroi gjatë fundjavës ku shprehte hapur mbështetjen për partinë e ekstremit të djathtë Alternativa për Gjermaninë (AfD).
“Musk është i lirë të thotë mendimin e tij. Në fund të fundit, liria e shprehjes mbulon edhe marrëzitë më të mëdha”, komentoi më tej zëdhënësja.
Mbështetja e Musk, i cili do të shërbejë si këshilltar i administratës së presidentit të sapozgjedhur të SHBA-së, Donald Trump, për AfD-në, vjen në një kohë që gjermanët përgatiten të shkojnë në zgjedhje më 23 shkurt pas rënies së qeverisë së koalicionit të kancelarit Olaf Scholz.
Artikulli i Musk, i botuar në gazetën gjermane Welt am Sonntag, është një zhvillim shtesë në pikëpamjen e tij të shprehur hapur me një postim në X javën e kaluar, ku ai shkroi se “vetëm AfD mund ta shpëtojë Gjermaninë”, ku ai vlerësoi qëndrimet e kësaj partie për rregullimin e tregut, taksimin dhe derregullimin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
