.png)
Anëtari i kryesisë së Partisë Demokratike, Belind Këlliçi, ka paralajmëruar shkrirje të dy grupeve të PD, atij të Rithemelimit dhe deputetëve që rreshtohen krah Gazmend Bardhit, në një strukturë të vetme.
Sipas Këlliçit, brenda janarit pritet që grupimi i Bardhit të integrohet në PD.
“Zoti Bardhi është kryetar i zgjedhur i Grupit Parlamentar të PD-së. Jo vetëm me Gazmend Bardhin por me të gjithë deputetët që marrin pjesë në mbledhjet periodike të PD ku janë 43 deputetët, të gjithë janë të ftuar të jenë në shtëpinë e tyre. Në çdo moment të ftuar dhe janë pjesë e PD. Pa diskutim kam bindjen që brenda pak javësh, apo brenda janarit do të arrihet të gjendet një formulë për t’u bashkuar, jo vetëm si grup parlamentar por edhe brenda strukturave, edhe brenda PD. E gjithë trupa në një. Nuk po negociojmë por është një nevoje reale, akute dhe që nuk mundet të vonohet më shumë”, tha Këlliçi në emisionin “Debat” në A2CNN
“Zoti Bardhi aksionin e tij politik brenda Parlamentit e ka kryer më së miri. Që nga momenti kur grupi parlamentar i PD u bashkua, arritën që brenda 2 muaj e pak ditësh të tërhiqnin vëmendjen e të gjithë opinionit ndërkombëtar mediatik. Në protesta kanë preferuar të mos jenë pjesë se ashtu e kanë gjykuar. Unë nga ana ime nuk shoh asnjë problem për sa kohë ata kanë bërë detyrën e tyre shumë mirë brenda sallës së Parlamentit. Asgjë nuk i pengon që në javën e parë të janarit të vijnë të bashkohen me strukturat dhe do ndodhi, është normale”, vijoi ai.
Këlliçi komentoi edhe vendimin që pritet të japë GJKKO ndaj Sali Berishës.
Cilido do të jetë vendimi i gjykatës për masën e sigurisë ndaj tij, sipas Këlliçit, Berisha është përgatitur vetë, por ka përgatitur edhe grupimin të cilin drejton.
“Në komunikimet e mia me zotin Berisha, ai ka qenë shumë i qartë dhe para tre javësh më ka thënë mua personalisht që do t’i hiqet e drejta e komunikimit me qytetarët,” tregoi Këlliçi.
Megjithatë, cilido qoftë vendimi, duket se komunikimi i liderit të demokratëve me qytetarët apo aleatët nuk do të mungojë.
“Ka filluar të bëhen përgatitjet për këtë vendimmarrje. Berisha ka qenë i vetëdijshëm, ka anticipuar edhe mënyrën sesi do të komunikojë qoftë me opinionin e gjerë publik, qoftë me bashkëpunëtorët e tij. Do ta shihni në ditët në vijim” Sa i përket vendimit të sotëm Këlliçi shprehet: “Skenari do të çohet deri në fund. Berisha do të izolohet në arrest shtëpie.”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
