Në ditën e 39-të të protestës, banorët e “Unazës së Re” me pankarta në duar kanë bllokuar rrugën, duke kërkuar anulimin e projektit, i cili parashikon shembjen e shtëpive të tyre.
Të mbështetur nga deputetët e opozitës, ata paralajmëruan ARRSH-në që të mos u afrohet banesave të tyre: “I bëjmë thirrje ARRSH të mos afrohet, se do ta djegim për së gjalli, mos guxojë të afrohet”, tha njëra nga banorët e “Astirit”.
Në protestën e sotme, Basha nuk ishte i pranishëm, por opozita përfaqësohej nga deputetët Klevis Balliu dhe Endrit Braimllari, të cilët i bënë thirrje qytetarëve që t’i bashkohen protestave që kanë shpërthyer në gjithë Shqipërinë.
“Kam 40 ditë që e denoncoj këtë aferë korruptive, paratë e këtyre banorëve po vidhen barbarisht. Përsa i përket dialogut, studentët janë në të drejtën e tyre, ftoj të gjithë qytetarët shqiptarë t’i mbështesin dhe t’i bashkohen”, u shpreh deputeti i PD-së, Klevis Balliu nga protesta e “Astirit”.
Nga ana tjetër, edhe deputeti i LSI-së, Endrit Braimllari në të njëjtën linjë shprehu bindjen se do t’i shkojë aferës deri në fund, duke kërkuar dorëheqjen e ministrit të Infrastrukturës, Damian Gjiknuri.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
