Gazeta Si – Një anëtar i fisit Bajri në Shkodër i ka shpëtuar një atentati mbrëmjen e të mërkurës, teksa udhëtonte me makinë në shoqëri të nënës së tij.
Admir Bajri, 38 vjeç, u qëllua me një breshëri automatiku në lagjen “Dobraç” në afërsi të një supermarketi.
Autorët e kanë ruajtur 38-vjeçarin, të cilin e kanë qëlluar sapo ka ndalur makinën e tij tip “Benz”.
Bajri mori disa plagë në trup dhe u dërgua menjëherë në spitalin rajonal të Shkodrës, ku ndodhet nën kujdesin e mjekëve.
Ndërsa nëna e tij për fat të mirë nuk ka pësuar asnjë lëndim. Autorët pas atentatit u larguan me shpejtësi nga vendi i ngjarjes, ndërsa policia ngriti postblloqe në hyrje-daljet e qytetit në përpjekje për kapjen e tyre.
Ndërkohë, kjo është makina që raportohet se është përdorur nga autorët për atentatin e kryer ndaj Admir Bajrit mbrëmjen e kaluar në Shkodër. Makina është kapur nga kamerat e sigurisë së një biznesi.
Nga të dhënat paraprake, Admir Bajri nuk del të jetë një person me precedent penal, ndërsa pista kryesore ku po hetohet është ajo e konflikteve të familjarëve të tij, duke qenë se është pjesëtar i fisit të Bajrave në Shkodër.
Fisi Bajri është jo pak i njohur, kjo për faktin se në vitin 2018, në kuadër të operacionit ‘Oaz’, u arrestuan disa prej anëtarëve, të akuzuar për grup të strukturuar kriminal, gjobëvënie, vrasje dhe punësime të paligjshme.
Por dosja e bujshme tashmë është shfryrë, pasi të gjithë personat, të cilët u vunë në pranga janë liruar nga akuzat e vrasjes, kanosjes, gjobëvënies, basteve të paligjshme dhe shumë të tjera.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
