.png)
Nga Gazeta Si – Kur agjentët federalë arrestuan emra të njohur nga NBA javën e kaluar, gjithçka u shpalos si një dramë morale për hapjen e sezonit: një trajner, një mbrojtës titullar dhe një rrjet bastesh të paligjshme e pokeri të manipuluar, me lidhje me mafien.
Dokumentet gjyqësore përshkruajnë dy skema të ndërlidhura: një që lidhet me pokerin illegal me teknologji të sofistikuar, dhe një tjetër që shfrytëzonte informacion të brendshëm për baste individuale.
Emrat më të bujshëm ishin Chauncey Billups nga Portland dhe Terry Rozier nga Miami.
Dosjet e paraqitura në Gjykatën Federale të Nju Jorkut (Distrikti Lindor) përfshijnë mbi 30 të pandehur, përshkruajnë përdorimin e teknologjive mashtruese — si tavolina me “rreze X”, përzierës kartash të manipuluar — si dhe një rrjet bastesh të brendshme që përfshinte ndeshje specifike të NBA gjatë sezonit 2023–24.
Liga ndërkohë i ka pezulluar të përfshirët deri në përfundimin e hetimeve.
Një raport i “American Gaming Association” (AGA) i publikuar në Gusht 2025 jep një përgjigje të ftohtë:
Amerikanët vlerësohet se vënë bast 673.6 miliardë dollarë në vit me operatorë të paligjshëm dhe të parregulluar, duke u sjellë atyre 53.9 miliardë dollarë të ardhura, dhe duke privuar shtetet nga 15.3 miliardë dollarë taksa.
Detajet janë tronditëse:
– Bastet e paligjshme sportive: 84 miliardë $ xhiro dhe 5 miliardë $ fitime.
– Lojërat e paligjshme online (iGaming): 466.2 miliardë $ xhiro dhe 18.6 miliardë $ fitime.
– Makinat e “aftësisë” pa licencë, që gjenden shpesh në bare e stacione karburanti: mbi 123 miliardë $ baste dhe 30.3 miliardë $ fitime.
– Pra, nuk bëhet fjalë për “veprimtari rrugësh të errëta” – është një ekonomi paralele e vërtetë.
Bastet individuale mbi performancën e lojtarëve mbeten një pikë presioni të ndjeshëm — një lojtar, një treg, një informacion i vetëm mund të lëvizë miliona.
Ndërkohë, tregu i paligjshëm i “iGaming” ende zë rreth 66% të aktivitetit total të kazinove online në SHBA (nga 75% në 2022), dhe makinat e paligjshme përbëjnë rreth 40% të pajisjeve të lojërave të fatit në vend – pa mbrojtje për konsumatorin dhe me rrezik të lartë pastrimi parash.
Nuk është se arrestimet e javës së kaluar nuk kanë rëndësi – përkundrazi, ato tregojnë sa lehtë mund të manipulohet tregu i basteve mbi performancën individuale dhe si lidhet bota e nëndheshme e tyre me sportin profesionist.
Por problemi qëndron diku tjetër: Tregu i paligjshëm është ende shumë më i madh se aftësia e autoriteteve për ta kontrolluar.
Nëse sporti dëshiron më pak skandale, rregullatorët dhe operatorët duhet të bëjnë zinxhirin e paligjshëm më të kushtueshëm për t’u mbajtur sesa sistemin ligjor për t’u përdorur.
Kjo do të thotë veprim i koordinuar mbi pagesat dhe domenet, udhëzime të qarta për konsumatorët dhe një gamë më të kufizuar e më të mbikëqyrur të basteve individuale gjatë sezonit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
