.png)
Pas botimit në Fletoren Zyrtare të dekretit të presidentit Ilir Meta për anulimin e zgjedhjeve vendore të 30 qershorit, bashkitë e djathta dhe ato të LSI-së kanë nisur punën për zbatimin e dekretit.
Përmes një shkrese drejtuar Komisionit Qendror të Zgjedhjeve, kryetari i bashkisë së Kukësit, Bashkim Shehu, kërkon lirimin e menjëhershëm të ambienteve të KZAZ nr. 11 pranë qendrës kulturore ‘Hasan Prishtina’ si edhe palestrës sportive të Shkollës së Mesme të Përgjithshme ‘Havzi Nela’.
Gjithashtu në shkresë kryebashkiaku i Kukësit kërkon nga KQZ heqjen e listës së zgjedhësve të afishuar në institucionet arsimore.
Kryebashkiaku i Kavajës, Isa Sakja, në letrën e firmosur për KQZ-në, Ministrisë së Brendshme si edhe Prefekturës Tiranë, kërkon që KZAZ nr. 42 të ndërpresë të gjitha veprimet për afishimin e listave të zgjedhësve në të gjitha shkollat të cilat janë në pronësi të Bashkisë Kavajë.
Të njëjtën kërkesë kanë dorëzuar pranë KQZ edhe kreu i Bashkisë së Matit, Nezir Rizvani, si edhe kreu i Bashkisë në Skrapar, Nesim Spahiu.
Lirimin e ambjenteve të KZAZ me qëllim zbatimin e dekretit të Presidentit Ilir Meta për anulimin e zgjedhjeve të 30 qershorit e kanë kërkuar edhe kryetarja e Bashkisë në Gjirokastër, Zamira Rami.
Edhe kryetarja e Bashkisë Shkodër, në letrën drejtuar KZAZ-ve në këtë qytet, kërkon prej tyre lirimin e menjëhershëm të ambienteve në funksion të procesit zgjedhor.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
