Drita jeshile në fund të tunelit për Tiranë po ndizet. Skuadra bardheblu ka marrë një fitore shumë të vuajtur, por me shumë vlerë përballë Flamurtarit mbrëmjen e kësaj të premte në “Selman Stërmasi” në shifrat 1-0. U desh që të dyja ekipet të vuanin shumë në këtë përballje, por që në fund fati iu buzëqeshi kryeqytetasve.
10 minutat e para të ndeshjes ishin shumë të mira për miqtë nga Vlora që patën disa raste për të shënuar, por sulmuesit nuk arritën të konkretizonin siç duhej. Me kalimin e këtyre minutave të para, Tirana e kalon edhe këtë start të dobët, duke tentuar të dalë përpara. Kryeqytetasit iu afruan disa momente golit, por as Halili dhe as Sentamu nuk ishin të saktë në gjuajtjet e tyre. Vlonjatët nga ana tjetër u kundërpërgjigjën me anë të Danilo Alvesh, por as braziliani nuk e kishte saktësinë e duhur. Në fundin e pjesës së parë Tirana humbi dhe rastin më të mirë, teksa Sentamu me portën e boshatisur nuk arriti të shënonte. Me pjesën e parë që u mbyll në barazim pa gola, në fraksionin e dytë loja do të vijonte me të njëjtin ritëm.
Është sërish Tirana që kërkoi të shënoi, një herë me Sentamun dhe më pas me Turtullin, u duk sikur goli ishte një “mollë e ndaluar” për bardhebluë. Në minutën e 80-të Flamurtari mbeti me një lojtarë më pak, pas daljes me të kuq të Pollozhanit dhe kjo gjë ndikoi shumë në vazhdimin e ndeshjes, me Tiranën që u hodh e gjitha në sulm në kërkim të golit të fitores. Dhe goli i triumfit nuk do të vononte shumë, pasi në të 85-ën do të realizonte shkodrani Edon Hasani. Mesfushori shfrytëzoi në maksimum aftësitë e tij, duke i shpëtuar mbulimit të mbrojtësve dhe mposhti Koliçin.
Mbyllet kështu 1-0 në favor të Tiranës kjo përballje e luftuar deri në minutat e fundit. Ilir Daja mposhtet kështu nga ish-ekipi i tij dhe Flamurtari e shikon veten shumë larg nga Kupat e Europës. Sakaq Tirana me këtë tre pikësh mund të marrë frymë e qetë deri në fund të këtij viti dhe të mendojë më me qetësi për merkaton e dimrit, ku duhen përforcime me çdo kusht nëse duan të evitojnë luftën për mbijetesë.
Formacionet e të dyja ekipeve:
Tirana: Abibi, Imami, Hoxhallari, Turtulli, Kërçiku, Maveje, Hasani, Kobina, Sentamu, Greca, Halili. Trajner: Ardian Mema
Flamurtari: Koliçi, Siljanovski, Alla, Pollozhani, Kotobelli, Useini, Batha, Mustafa, Torasa, Kale, Alvesh Trajner: Ilir Daja
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
