.png)
Nga Gazeta ‘SI’ – Në anketën e kryer nga Këshilli i Bashkëpunimit Rajonal RCC, 49% e shqiptarëve të pyetur kanë pranuar se mendojnë largimin nga Shqipëria. Për 67% të tyre destinacioni i ëndrrave është një nga vendet e BE-së dhe për 22% SHBA.
Në pyetjen e mundësisë për të studiuar jashtë, 53% nga shqiptarët që janë anketuar thonë se nuk kanë dëshirë të lëvizin, por sipas RCC kjo lidhet dhe me grupmoshën e të anketuarve.
Barometri ndalet edhe tek sundimi i ligjit në vend, ku situata duket shqetësuese në të gjithë Ballkanin, me Shqipërinë të parën. 82% e shqiptarëve thonë se sundimi i ligjit nuk zbatohet ose nuk është efektiv në vend. 87% e tyre perceptojnë se ligji nuk është i barabartë për të gjithë.
Të ndara sipas funksioneve, shqiptarët kanë pak ose aspak besim te institucionet publike. Sipas anketës, 74% e tyre nuk besojnë në gjykata dhe drejtësi. Norma më e lartë e mosbesimit është tek partitë politikë, 84%, ndërsa ajo më e ulëta tek forcat ushtarake, 40%.
Ndonëse kanë qasje pozitive ndaj idesë së bashkëpunimit rajonal dhe lidhjes më të fortë ekonomike, 76% e shqiptarëve do të zgjidhnin për konsum produkte vendas, 18% nga BE-ja dhe vetëm 2% nga rajoni. Vendet fqinje janë më të hapura për tregti midis shteteve të Ballkanit Perëndimor.
RCC kryen anketën me një numër të caktuar qytetarësh, fokus-grup, dhe përqindjet janë rezultat i pjesëmarrësve dhe jo të gjithë popullsisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
