.png)
Nga Gazeta Si- Pas disa ditësh informimi, sekretarja e brendshme Shabana Mahmood ka publikuar një dokument prej 33 faqesh që përshkruan politikat që ajo shpreson se do të frenojnë kërkesat e rreme për azil dhe do të ulin numrin e njerëzve që përpiqen të udhëtojnë përmes Kanalit me anije të vogla.
Fundi i mbrojtjes së përhershme për refugjatët
Sipas dokumentit, ata që marrin status refugjati në Britani nuk do të gëzojnë më 5 vite leje qëndrimi, por një periudhë shumë më të shkurtër, vetëm 30 muaj, pas të cilëve statusi do të rishikohet. Ekspertët e ligjit të emigracionit e kritikojnë këtë si politikë ndëshkuese edhe ndaj atyre që e fitojnë ligjërisht statusin e azilit.
Një nga pikat më të rëndësishme është masa që prek drejtpërdrejt shqiptarët.
Rreth 700 familje shqiptare të cilave u është refuzuar azili dhe kanë refuzuar të largohen nga Britania, janë vendosur në shënjestër të dëbimit të detyruar. Një gjë të tillë e ka deklaruar edhe vetë Mahmood në Parlament, të hënën, 17 nëntor.
“Për shembull, ka rreth 700 familje shqiptare, kërkesat e të cilave për azil janë refuzuar, megjithatë, largimi i tyre nuk po zbatohet aktualisht nga Ministria e Brendshme, pavarësisht se Shqipëria ka një standard të artë bashkëpunimi me Mbretërinë e Bashkuar për kthimet dhe është nënshkruese e Konventës Europiane për të Drejtat e Njeriut. Ne do të nisim një konsultim mbi procesin e zbatimit të largimit të familjeve, përfshirë fëmijët”, deklaroi ajo.
Sipas dokumentit, qeveria laburiste do të “largojë njerëz që nuk i kemi larguar më parë, përfshirë familjet” dhe do të ndërpresë pagesat e mirëqenies për familjet që kërkojnë azil me fëmijë por u është refuzuar dhe ndërkohë refuzojnë të largohen nga Mbretëria e Bashkuar.
“Qeveria do t’u ofrojë të gjitha familjeve mbështetje financiare për t’u mundësuar atyre të kthehen në vendin e tyre të origjinës. Nëse ata e refuzojnë këtë mbështetje, ne do të përshkallëzojmë në një kthim të detyruar. Ne do të nisim një konsultim mbi procesin e zbatimit të largimit të familjeve, përfshirë fëmijët”, thotë dokumenti.
Heqja e kërkesës ligjore për të mbështetur azilkërkuesit e varfër
Qeveria do të heqë një kërkesë ligjore për të ofruar mbështetje për azilkërkuesit që ishin të varfër.
Sipas dokumentit, ky detyrim u prezantua për herë të parë në vitin 2005 për të zbatuar ligjin e BE-së, të cilin Mbretëria e Bashkuar nuk është më e detyruar ta ndjekë.
“Duke vepruar kështu, ne do t’u mohojmë mbështetjen atyre që kanë të drejtë të punojnë dhe për këtë arsye mund të mbulojnë vetë mbrojtjen e tyre”, shkruhet në dokument.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
