Më shumë se 100 qeveri sot morën angazhime historike për t’i dhënë fund dhunës së fëmijëve, duke përfshirë premtimin për të ndaluar shuplakat e prindërve, një çështje që prek 3 në çdo 5 fëmijë rregullisht në shtëpitë e tyre. Këto angazhime u bënë në një ngjarje historike në Bogota, Kolumbi, ku delegacionet qeveritare do të bien dakord për një deklaratë të re globale që synon mbrojtjen e fëmijëve nga të gjitha llojet e dhunës, shfrytëzimit dhe abuzimit.
Gjithashtu në aktivitetin, i cili organizohet nga qeveritë së bashku me Organizatën Botërore të Shëndetësisë (OBSH), UNICEF-in dhe Përfaqësuesin Special të Sekretarit të Përgjithshëm të Kombeve të Bashkuara për Dhunën ndaj Fëmijëve, disa vende u angazhuan për të përmirësuar shërbimet për fëmijërinë, të mbijetuarit e dhunës ose të trajtojnë bullizmin, ndërsa të tjerë thanë se do të investonin në mbështetjen kritike të prindërve, një nga ndërhyrjet më efektive për reduktimin e rreziqeve të dhunës në shtëpi.
“Pavarësisht se dhuna është shumë e parandalueshme, mbetet një realitet i tmerrshëm i përditshëm për miliona fëmijë në mbarë botën, duke lënë plagë që zgjasin me breza”, tha Dr Tedros Adhanom Ghebreyesus, Drejtor i Përgjithshëm i OBSH-së.
Sot vendet bënë premtime kritike që, nëse zbatohen, mund të ndryshojnë gjithë historikun e dhunës. Nga krijimi i mbështetjes që ndryshon jetën për familjet deri tek bërja e shkollave vende më të sigurta ose trajtimi i abuzimit në internet, këto veprime do të jenë thelbësore për mbrojtjen e fëmijëve.
Mbi gjysma e të gjithë fëmijëve në mbarë botën, rreth 1 miliardë, vlerësohet se vuajnë nga një formë dhune, siç është keqtrajtimi (përfshirë ndëshkimin fizik, forma më e përhapur e dhunës në fëmijëri), ngacmimi, abuzimi fizik ose emocional, si dhe dhuna seksuale. Dhuna ndaj fëmijëve shpesh fshihet, ndodh kryesisht pas dyerve të mbyllura dhe raportohet shumë më pak. OBSH vlerëson se më pak se gjysma e fëmijëve të prekur i tregojnë kujtdo se kanë përjetuar dhunë dhe nën 10% marrin ndonjë ndihmë.
Një dhunë e tillë jo vetëm që përbën një shkelje të rëndë të të drejtave të fëmijëve, por gjithashtu rrit rrezikun e problemeve shëndetësore të menjëhershme dhe afatgjata. Për disa fëmijë, dhuna rezulton me vdekje ose lëndime të rënda. Çdo 13 minuta, një fëmijë ose adoleshent vdes si rezultat i vrasjes, që barazohet me rreth 40. 000 vdekje të parandalueshme çdo vit.
Për të tjerët, përjetimi i dhunës ka pasoja shkatërruese dhe të përjetshme. Këto përfshijnë ankthin dhe depresionin, sjelljet e rrezikshme si pirja e duhanit dhe abuzimi me substancat dhe arritjet e pakta akademike.
Provat tregojnë se dhuna ndaj fëmijëve është e parandalueshme, ku sektori i shëndetësisë ka një rol kritik. Zgjidhjet e provuara përfshijnë mbështetjen e prindërve për ti ndihmuar të shmangin disiplinimin e dhunshëm dhe të ndërtojnë marrëdhënie pozitive me fëmijët e tyre, ndërhyrjet në shkollë për të forcuar aftësitë jetësore dhe sociale për fëmijët dhe adoleshentët dhe parandalimin e bullizmit, shërbime sociale dhe shëndetësore miqësore për fëmijët që përjetojnë dhunë, ligjet që ndalojnë dhunën ndaj fëmijëve dhe zvogëlojnë faktorët themelorë të rrezikut si aksesi në alkool dhe armë, dhe përpjekjet për të siguruar përdorim më të sigurt të internetit për fëmijët. Hulumtimet kanë treguar se kur vendet zbatojnë në mënyrë efektive strategji të tilla, ato mund të reduktojnë dhunën ndaj fëmijëve deri në 20-50%.
Në përputhje me Konventën e OKB-së për të Drejtat e Fëmijës, objektivat e para globale për t’i dhënë fund dhunës ndaj fëmijëve u vendosën në Objektivat e Zhvillimit të Qëndrueshëm të Kombeve të Bashkuara. Megjithatë, progresi në reduktimin e përhapjes së përgjithshme të dhunës në fëmijëri ka qenë i ngadaltë, pavarësisht nga arritjet në disa vende individuale. Rreth 9 në 10 fëmijë ende jetojnë në vende ku format e përhapura të dhunës në fëmijëri, si ndëshkimi me rrahje, apo edhe abuzimi dhe shfrytëzimi, nuk janë ende të ndaluara me ligj.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
