.png)
Samiti i shume pritur filloi; Mëngjesin e të hënës në Glasgow të Skocisë u hap zyrtarisht edicioni i 26-të i Konferencës së Palëve, samiti vjetor i Kombeve të Bashkuara kushtuar klimës. Mjaftoi vetëm një fjali e kryeministrit britanik Boris Johnson për të theksuar rëndësinë e këtyre punimeve: “Nëse Glaskow dështon, atëherë gjithçka dështon”.
Nga e hëna deri të premten e 12 nëntorit, në dhoma të posaçme për negociatat diplomatike, delegatë nga të gjitha kombet e botës do të kërkojnë një marrëveshje që mund të shpëtojë Tokën nga ngrohja globale, ndërsa aktivistët e jashtëm, OJQ-të, kompanitë do t’i japin jetë samitit me shpresën për të qenë në gjendje të ndikojë në të fuqishmit e planetit.
Green and Blue, kanali i Gedi Group kushtuar mjedisit dhe inovacionit, për dy javët e ardhshme do të ndjekë punimet e Cop26 me korrespondentët e tij në Glasgoë, me transmetim të drejtpërdrejtë, intervista me protagonistët, sfond dhe përditësime në kohë reale mbi ecurinë e negociatave. Një përpjekje e jashtëzakonshme gazetareske, për një ngjarje që, në të mirë e në të keq, do të bëjë historinë.
Për të kuptuar qëllimin e Konferencës që nisi të hënën në kryeqytetin skocez, duhet të hedhim një sy këtu e gjashtë vjet më parë.
Në Konferencën e 21-të të Parisit për Ndryshimet Klimatike (COP21), vendet nënshkruese të Konventës Kornizë të Kombeve të Bashkuara për Ndryshimet Klimatike (UNFCCC) arritën një marrëveshje për të luftuar ndryshimet klimatike në mënyrë që të mbanin temperaturat mesatare globale nën 2°C. mbi nivelet para-industriale, duke kërkuar të kufizojnë rritjen në 1.5°C.
Që do të thotë se vendet janë zotuar t’i zvogëlojnë gazrat serë që i emetojnë në mënyrë që ta ngadalësojnë ngrohjen globale. Përndryshe, ngrohja do të ketë pasoja të pakthyeshme, katastrofale për jetën në planet.
Gjithsej 195 vende e kanë ratifikuar marrëveshjen në nivel kombëtar, duke u zotuar kështu të veprojnë në nivel kombëtar dhe lokal për të zvogëluar emetimet e gazrave serë.
Marrëveshjes iu dha kohë pesë vjet, dhe me Konferencën e 26-të për Ndryshimet Klimatike (COP26), gjerat duhet të kishin filluar të bëheshin serioze.
Por pandemia hodhi në erë Konferencën e Palëve që duhej të ishte mbajtur vitin e kaluar dhe po ashtu edhe vendimet.
Sidoqoftë, as viti shtesë, i dhënë për shkak të Covid-it, nuk ishte i dobishëm për heqjen e pengesave të shumta në rrugën drejt një bote “neutrale të karbonit”, pa emetime të gazit karbonik CO2 në atmosferë. Siç doli në orët e fundit në Romë, në punën e G20, ka vende të mëdha, Kina, India dhe Rusia, të cilat kërkojnë më shumë kohë (2060 në vend të 2050) për dekarbonizim dhe nuk e konsiderojnë 1.5 gradë më të detyrueshme. por ata do të kënaqeshin të qëndronin nën 2 gradë (Plani B i Marrëveshjes së Parisit)
Tani është çështja nëse 15 ditët e ardhshme do të shërbejnë vetëm për të bërë fotografi për një situatë që tashmë është kristalizuar (BE-ja dhe SHBA e drejtuar nga Biden po shtyjnë për të përshpejtuar tranzicionin ekologjik, ndërsa vende të tjera të mëdha e pengojnë), apo nëse në vend të kësaj, diplomacia e klimës do të jetë në gjendje të zhbllokojë situatën dhe t’i paraqesë botës një marrëveshje që mund të përshëndetet si një sukses më 12 nëntor.
Sigurisht, duke pasur parasysh premisat, duket e vështirë që një nga dëshirat e presidencës britanike të COP26 të realizohet: zhvendosjen e energjisë së qymyrit në kalendat e historisë
Në hapje të samitit, Patricia Espinosa, udhëheqëse e Zyrës së Kombeve të Bashkuara për Klimën, tha se liderët qeveritarë përballen me dy dilema: që të zvogëlojnë emetimet e gazrave serrë dhe t’iu ndihmojnë komuniteteve dhe shteteve që t’iu mbijetojnë ndryshimeve klimatike “apo të pranojnë se njerëzimi do përballet me një të ardhme të zymtë të planetit”.
Pershtati ne shqip; Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
