.png)
Nga 1 janari i vitit që vjen 40 mijë familje shqiptare mund të rivlerësojnë banesat e tyre me 3% nga 15 % që është aktualisht taksa e rivlerësimit. Lajmin e bënë me dije sot Ministrja e Financave Anila Denaj dhe Kreu i Komisionit për Ekonominë dhe Financat Arben Ahmetaj.
Sipas Financave, procesi do të zgjasë 9 muaj, jo një vit të plotë kalendarik dhe efektet në buxhet nga kjo amnisti fiskale do të jenë 4 mld lekë.
Amendimi pritet të mbërrijë në kuvend pas konsultimeve të Ministrisë së Financave me institucionet e varësisë dhe kryeministrin.
Një banesë rivlerësohet për të kuptuar se sa është çmimi aktual i tregut që të merret si referencë për një transaksion të mundshëm shitjeje.
Përshembull, një banesë e privatizuar në vitin 1993 në Tiranë është blerë në atë kohë 15.000 lekë.
Hipoteka e merr si referencë për çmim fillestar këtë çmim në rast se pronari i banesës vendos ta shesë shtëpinë.
Çmimi aktual i asaj banese është 15 milionë lekë, tatimi që paguan pronari-shitës llogaritet si diferencë mes 15 milionëve me 15 mijë lekë dhe shumëzohet me 15% që është aktualisht taksa e rivlerësimit.
Amnistia që pritet të hyjë në fuqi më 1 janar 2020 banesat do të rivlerësohen me një taksë 3% të diferencës mes çmimit të tregut dhe çmimit fillestar kur është blerë shtëpia.
Kjo është hera e tretë që qeveria amniston qytetarët për të rivlerësuar shtëpitë e tyre.
Amnistia e parë u bë më 2011 ku taksa e rivlerësimit u përcaktua 1,5 % dhe amnistia e dytë më 2016-ën me një taksë rivlerësimi 2%.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
