Kreu i Bashkimit Demokratik për Integrim, Ali Ahmeti ka reaguar pas akuzave ndaj Thaçit, Veselit, Krasniqit dhe Rexhepit nga Prokuroria Speciale.
Përmes një postimi në Facebook, Ahmeti shkruan se lufta e Ushtrisë Çlirimtare të Kosovës ishte luftë e drejtë e kombit shqiptar për liri dhe vetëvendosje, por edhe për drejtësi dhe sundim të së drejtës, shoqëri demokratike dhe kohezive, të orientuar drejt vlerave euro-amerikane.
“Jam i bindur që shokët e mi, bashkëluftëtarët e mi, do të dëshmojnë luftën e drejtë të Ushtrisë Çlirimtare të Kosovës dhe do të kthehen fitimtarë”, thotë ai. “Unë e di se si unë, ashtu edhe shokët e mi, po të kishim edhe një jetë, edhe një mundësi, edhe një kushtrim për të luftuar për liri dhe barazi, do ta bënim përsëri sepse besuam dhe besojmë në të drejtën e kombit tonë.
Ahmeti thekson se të gjithë të akuzuarit në Kosovë janë duke respektuar plotësisht sundimin e ligjit dhe drejtësinë vendore e ndërkombëtare.
“Të gjitha arritjet tona në këto dekada i kemi realizuar bashkarisht me miqtë tanë ndërkombëtar dhe bashkarisht, duke respektuar vlerat e përqafuara nga të gjithë ne, e do ta përfundojmë rrugëtimin tonë drejt lirisë, pavarësisë, drejtësisë dhe integrimit. Sundimi i ligjit dhe drejtësia e mirëfilltë joselektive janë synime të të gjithë neve andaj dhe përgëzoj krerët e Kosovës që iu përgjigjën thirrjes së drejtësise në mënyrën më dinjitoze dhe ju uroj kthim sa më të shpejtë në detyrat e tyre që i presin”, përfundon Ahmeti.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
