Gazeta Si – Prokuroria e Posaçme ka dhënë pretencën për ish-gjyqtarin e Gjykatës së Lartë, Guxim Zenelaj, duke kërkuar 1 vit burg për shkak të refuzimit të deklarimit dhe fshehje të pasurisë.
Në aplikim të nenit 59, SPAK kërkon që ish gjyqtari i Lartë të mos dërgohet në qeli, por të vendoset në shërbim prove për një periudhë 24 mujore.
LEXO EDHE:
GJKKO konfiskon pasuritë e ish-gjyqtarit të Gjykatës së Lartë, Guxim Zenelaj
SPAK kërkon që Zenelaj të shpallet fajtor për akuzën e “refuzimi për deklarimin, mosdeklarimin, fshehja ose deklarimi i rremë i pasurive, interesave privatë dhe personave të zgjedhur dhe nëpunësve publikë ose i çdo personi tjetër që ka detyrim ligjor për deklarim”.
Zenelaj u tërhoq nga sistemi drejtësisë para se të kalonte në filtrin e vettingut. Më 9 tetor të vitit të kaluar, ish-anëtarit të Gjykatës së Lartë iu sekuestruan nga GJKKO edhe pasuritë, që përfshinin apartamente në zonën e Lezhës por edhe një truall në Porto Palermo.
Në deklaratën e pasurisë të bërë në vitin 2016, Zenelaj deklaronte se kishte në pronësi 18 apartamente dhe tre njësi ndërtimore në Ishull-Shëngjin, Lezhë. Si burim për krijimin e pasurive të paluajtshme, gjyqtari referoi një kontratë me një kompani të caktuar, por nuk dha të dhëna se sa është vlera e kontratës si dhe për burimin e parave që mbulojnë vlerën e kontratës.
Ndërkohë, vijon gjykimi për pasuritë e sekuestruara të Zenelajt, për të cilat shkalla e parë ka vendosur konfiskimin, por çështja është në Apel.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
