Behar Pema është dënuar me 4 vite burg nga Gjykata e Tiranës, pasi përplasi makinën ku udhëtonin 4 vajza nga Shkodra, 2 prej të cilave humbën jetën. Aksidenti i rëndë ndodhi pasditen e 13 shtatorit në tunelin e autostradës Tiranë-Elbasan.
Drejtuesi i “Benz”-it, Behar Pema, i cili goditi nga pas makinën ku po udhëtonin katër vajzat, ishte me shpejtësi 160 km në orë dhe dyshohet se ai nuk ka frenuar në momentin e aksidentit.
Goditja nga pas ishte aq e fortë saqë dalja e tunelit ishte mbuluar nga pluhuri e tymi në formë mjegulle.
Sipas dëshmive të vajzave të mbijetuara, drejtuesi po kryente manovra të rrezikshme në rrugë dhe përfundoi duke i goditur ato nga mbrapa me shpejtësi tepër të lartë.
Testi i alkoolit dhe veprimet e grupit hetimor, e nxorrën 58-vjeçarin si personin përgjegjës që shkaktoi aksidentin e rëndë me dy viktima.
Katër vajzat po shkonin drejt Korçës për të festuar ditëlindjen e Lusindës, por kjo festë u kthye në tragjedi.
Lusinda Garunja, 19 vjeçe dhe Xhaneta Qallia, 18 vjeçe humbën jetën, ndërsa Denisa Dibra 26 vjeçe dhe Nervida Garunja 19 vjeçe përfunduan në spitalin e Traumës, duke e fituar luftën me vdekjen.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
