Gazeta Si – Shefi i Policisë Rrugore të Sarandës, nënkomisari A.Sh., është pezulluar nga detyra pas aksidentit me vdekje që ndodhi në orët e para të mëngjesit të aksin Sarandë-Ksamil, ku humbën jetën 2 turistë italianë; konkretisht shtetasit D. D., 24 vjeç dhe V. T., 32 vjeç.
Vendimi është marrë nga Drejtori i Përgjithshëm i Policisë së Shtetit, Muhamet Rrumbullaku, i cili ka urdhëruar gjithashtu ngritjen e një grupi të posaçëm, me specialistë nga Drejtoria e Standardeve Profesionale dhe nga Departamenti për Sigurinë Publike (Drejtoria e Policisë Rrugore) në Drejtorinë e Përgjithshme të Policisë së Shtetit, për të analizuar rastin, për të nxjerrë përgjegjësitë në lidhje me shkakun e ndodhjes së këtij aksidenti, si dhe për menaxhimin në tërësi të qarkullimit rrugor në territorin e Bashkisë së Sarandës.
Shefi i Rrugores së Sarandës u pezullua nga detyra për shkelje të rëndë të atributeve/kompetencave të Policisë, në lidhje me pasojat e aksidentit të ndodhur.
Gjithashtu, ka nisur menjëherë hetimi administrativo-disiplinor për të gjithë zinxhirin komandues të Sektorit të Policisë Rrugore në Drejtorinë Vendore të Policisë Vlorë, për mospërmbushje të procedurave standarde të punës, në lidhje me marrjen e masave për parandalimin e aksidenteve rrugore, gjatë sezonit turistik.
Dy turistët italianë po udhëtonin në orën 03:00 të mëngjesit në aksin Sarandë-Ksamil, kur u përplasën nga një makinë që drejtohej nga një adoleshent 17-vjeçar.
Ky i fundit ka qenë në makinë së bashku me një tjetër të mitur, të cilët mbetën të dy të plagosur dhe u dërguan në spital.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
