A janë binjakët alergjikë ndaj të njëjtave gjëra?

Alergjitë, qofshin teshtima pranverore për shkak të polenit apo vështirësi në frymëmarrje të shkaktuara nga një ushqim i caktuar, shkaktohen nga një kombinim i gjeneve të dikujt dhe mjedisit në të cilin jeton. Sa më shumë nga këto gjëra që ndajnë dy njerëz, aq më të larta janë shanset e tyre për të qenë alergjikë ndaj të njëjtave gjëra. Binjakët kanë më shumë gjasa të ndajnë alergji për shkak të gjithçkaje që kanë të përbashkët, por historia nuk mbaron këtu.

Alergjitë janë vërtet komplekse dhe shumë faktorë luajnë rol në atë se kush preket dhe kush jo.

Çfarë është një alergji?

Sistemi juaj imunitar prodhon proteina mbrojtëse, antitrupa, puna e të cilave është të mbajnë nën vëzhgim dhe të sulmojnë çdo mikrob pushtues ose substancë tjetër të rrezikshme që futet brenda trupit tuaj para se të mund t’ju sëmurin.

Një alergji ndodh kur trupi juaj ngatërron një substancë zakonisht të padëmshme me një ndërhyrës të dëmshëm. Këto molekula shkaktuese janë alergjenë. Antitrupat ngjiten në alergjenë, duke shkaktuar një reagim të sistemit imunitar.

Ky proces çon në simptoma të zakonshme të alergjisë: teshtima, hundë që rrjedhin ose janë të bllokuara, sy që kruhen dhe lotojnë dhe kollë.

Alergjitë mund të shkaktojnë gjithashtu një reaksion kërcënues për jetën, anafilaksinë, e cila kërkon vëmendje të menjëhershme mjekësore. Për shembull, nëse dikush ka ngrënë një ushqim ndaj të cilit është alergjik dhe më pas ka pasur ënjtje të fytit dhe skuqje, kjo do të konsiderohej anafilaksi.

Një person mund të jetë alergjik ndaj polenit të barit ose pemëve dhe pickimeve të bletëve, ose edhe ndaj kafshëve shtëpiake, insekteve apo dhe pluhurit që gjendet në dyshekë.

Një person mund të jetë alergjik edhe ndaj ushqimeve. Alergjitë ushqimore prekin 4% deri në 5% të popullsisë. Më të zakonshmet janë ndaj qumështit të lopës, vezëve, grurit, sojës, kikirikëve, peshkut dhe susamit. Ndonjëherë njerëzit i kalojnë alergjitë, dhe ndonjëherë ato zgjasin për gjithë jetën.

Identikë në alergji?

Të kthehemi te ideja e binjakëve: po, ata mund të jenë alergjikë ndaj të njëjtave gjëra, por jo gjithmonë.

Hulumtuesit në Australi zbuluan se 60% deri në 70% e binjakëve në një studim kishin të dy alergji mjedisore, dhe binjakët identikë kishin më shumë gjasa të ndanin alergji sesa binjakët joidentikë. Binjakët identikë ndajnë 100% të gjeneve të tyre, ndërsa binjakët jo identikë ndajnë vetëm rreth 50% të gjeneve të tyre, njësoj si çdo palë vëllezër e motra.

Shumë më tepër kërkime janë bërë mbi gjenetikën e alergjive ushqimore. Një studim mbi alergjinë ndaj kikirikëve zbuloi se binjakët identikë kishin më shumë gjasa të ishin alergjikë ndaj kikirikëve sesa binjakët jo identikë.

Pra, binjakët mund të jenë alergjikë ndaj të njëjtave gjëra, dhe ka më shumë të ngjarë që të jenë, bazuar në gjenetikën e tyre të përbashkët dhe rritjen së bashku. Por binjakët nuk janë automatikisht alergjikë ndaj të njëjtave gjëra.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.