A flenë pilotët gjatë fluturimit? Sindikatat: Gjumi në kabinë është i zakonshëm në Gjermani!

Gazeta Si – Gjumi në kabinën e pilotëve gjatë fluturimeve turistike është konsideruar prej kohësh tabu. Në Shtetet e Bashkuara të Amerikës, për shembull, një gjë e tillë madje është e ndaluar.

Por një sondazh i ri nga “Vereinigung Cockpit”, sindikata gjermane e pilotëve, zbulon se dremitja është tani e zakonshme në Gjermani.

Sipas anketës, e cila përfshinte mbi 900 pilotë, 93% pranuan se kanë rënë në gjumë gjatë fluturimit në muajt e fundit.

“Gjumi në kabinat e pilotëve gjermanë ka qenë prej kohësh normë”, konfirmoi Katharina Dieseldorff, nënkryetare e sindikatës.

“Ajo që filloi si një masë e përkohshme rimëkëmbjeje, është bërë një mjet strukturor për të adresuar mbingarkesën kronike”, tha ajo.

Presioni rritet, veçanërisht në verë, kur turnet e shpeshta në mbrëmje, mungesa e stafit dhe kufizimet operacionale e përkeqësojnë situatën. Pilotë nga disa linja ajrore morën pjesë në anketë.

Për 74% të të intervistuarve, dremitja është tani praktikë standarde, ndërsa 12% raportojnë se bien në gjumë për pak kohë në çdo fluturim.

Vetë shoqata sqaron se një dremitje e kontrolluar nuk përbën problem sigurie, por ngre alarmin: “Një ekuipazh i rraskapitur kronikisht, është një rrezik i konsiderueshëm. Një kulturë korporative që minimizon ose injoron lodhjen bëhet një rrezik sigurie”, paralajmëroi Dieseldorff.

Prandaj, “Vereinigung Cockpit” po bën thirrje që lodhja të njihet si një faktor rreziku, për rritjen e zbatimit të rregullave të shërbimit dhe që strategjitë e menaxhimit të gjumit të bazohen në shkencë.

Problemi i vërtetë demonstrohet nga ngjarjet ndërkombëtare. Në janar 2024, në Indonezi, kulla e kontrollit humbi kontaktin me një avion “Airbus A320” të “Batik Air” për gati gjysmë ore: të dy pilotët kishin rënë në gjumë. Kontakti me radio u rivendos vetëm falë një anëtari tjetër të ekuipazhit.