.png)
Gazeta Si – Një konflikt mes dy personave në Laprakë përfundoi me arrestimin e një 37-vjeçari, pasi dyshohet se ka përdorur një pistoletë që e mbante pa leje për të goditur një 47-vjeçar.
Ngjarja ndodhi mbrëmjen e 24 gushtit, rreth orës 21:45, në rrugën “Eshref Frashëri”. Pas marrjes së njoftimit për konfliktin, shërbimet e Komisariatit të Policisë Nr. 3, në bashkëpunim me Forcën e Posaçme “Shqiponja”, mbërritën në vendngjarje dhe ndërhynë për të parandaluar përshkallëzimin e situatës.
Sipas hetimeve paraprake, 37-vjeçari I. K., banues në Krujë, dyshohet se pas një konflikti për motive të dobëta ka goditur me qytën e pistoletës 47-vjeçarin A. M., banues në Laprakë, Tiranë.
Gjatë veprimeve policore u sekuestrua arma e zjarrit, së bashku me krehrin dhe fishekët. 37-vjeçari u arrestua në flagrancë dhe akuzohet për veprat penale që lidhen me ngjarjen dhe mbajtjen pa leje të armës. Ndërkohë, 47-vjeçari është proceduar në gjendje të lirë për “Moskallëzim të krimit”.
Policia njofton se po punon për të përcaktuar dinamikën e plotë të ngjarjes dhe motivet që çuan në përplasjen mes personave.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje