.png)
Gazeta Si – Të paktën tre mësues dhe tre nxënës humbën jetën në Tajlandë, pasi një nxënës 14-vjeçar hapi zjarr në një shkollë para se t’i jepte fund jetës, thanë autoritetet për agjencinë e lajmeve “Reuters”.
Policia e Nonthaburit konfirmoi numrin e viktimave dhe deklaroi se autori i dyshuar kreu vetëvrasje. Disa persona të tjerë mbetën të plagosur, përfshirë një mësues dhe tre nxënës.
Ngjarja ndodhi në distriktin Bang Kruai të provincës Nonthaburi, në veri të Bangkokut. Policia e identifikoi autorin si nxënës.
Megjithatë, burime të tjera – si Al Jazeera – që raportojnë për incidentin në shkollën Debsirin Nonthaburi, flasin për të paktën 20 të plagosur.
Policia deklaron se personi i akuzuar për hapjen e zjarrit në shkollë “vrau gjithsej tetë persona”. Sipas forcave të rendit, i dyshuari “qëlloi për vdekje gjyshërit e tij” dhe më pas, duke përdorur armën e gjyshit, “hapi zjarr në shkollën në zonën e Bangkokut, duke vrarë tre mësues dhe tre nxënës”, raporton AFP.
Policia tajlandeze deklaron se i dyshuari për sulmin në shkollë ishte një nxënës adoleshent i klasës së nëntë, i cili qëlloi 26 herë, ndërsa në vendngjarje u gjetën edhe 34 plumba të tjerë; këtë e raporton “The Guardian”, duke vënë në dukje se bëhet fjalë për sulmin e dytë të armatosur në një shkollë në Tajlandë pas një incidenti të ndodhur shkurtin e kaluar në jug të vendit, ku humbi jetën një mësues dhe u plagos një nxënës. Një mësues i shkollës e përshkroi atë si “një djalë të mirë me rezultate të mira në mësime”, i cili nuk njihej si person agresiv.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje