.png)
Gazeta Si – Pothuajse një vit pas vrasjeve të dyfishta të influencueses 23-vjeçare, Valeria Márquez – e vrarë më 13 maj 2025 gjatë një transmetimi të drejtpërdrejtë në TikTok – dhe kryetarit të bashkisë së Uruapanit, Carlos Manzo – i vrarë më 1 nëntor 2025 gjatë festimeve tradicionale të Ditës së të Vdekurve – Ramón Ángel Álvarez Ayala është arrestuar në Meksikë.
Ai dyshohet se është udhëheqësi i “Los Rs”, një prej celulave kriminale më të dhunshme të lidhura me Kartelin e Gjeneratës së Re të Jaliscos (CJNG), si dhe organizatori kryesor i të dyja vrasjeve.
Lajmi për arrestimin e Álvarez Ayala-s u bë i ditur nga qeveria meksikane përmes një postimi në rrjetet sociale nga Ministri i Sigurisë, Omar García Harfuch.
Sipas Sekretarit të Sigurisë, Omar García Harfuch, influencuesja Valeria Márquez kishte një lidhje romantike me Francisco Álvarez, djalin e “R-1” (Ramón Ángel Álvarez Ayala).
Raportet tregojnë se 23-vjeçarja i kishte dhënë fund lidhjes me Franciscon, i cili më pas i kërkoi të atit ta ndëshkonte atë.
Si pasojë, Ramón Ángel Álvarez Ayala dyshohet se urdhëroi vrasjen e të resë; ajo u vra brenda sallonit të saj të bukurisë në Zapopan.
Pak para vdekjes, influencuesja e re po realizonte një transmetim të drejtpërdrejtë në TikTok për t’u treguar rreth 90,000 ndjekësve të saj produktet e bukurisë nga salloni i saj.
Një vrasës me pagesë, i maskuar si punonjës dërgesash, hyri në sallon dhe e pyeti viktimën: “A je ti Vale?” Pasi Valeria konfirmoi identitetin e saj, burri hapi zjarr, duke e qëlluar tri herë.
Në pamjet që qarkulluan më vonë në internet, 23-vjeçarja shihet duke mbajtur gjoksin me duar para se të shembej përtokë, pa jetë, pak çaste më vonë.
Vetëm pak orë para krimit, Márquez u kishte treguar ndjekësve të saj se një person që bënte dërgesa, me fytyrë të mbuluar, kishte tentuar t’i jepte një dhuratë të shtrenjtë. “Ndoshta donin të më vrisnin apo diçka e tillë”, kishte komentuar ajo.
Pak ditë para se të vdiste, Valeria Márquez kishte regjistruar një video në të cilën u fliste ndjekësve të saj për ndryshimet që po ndodhnin në jetën e saj.
“Nuk dal më, nuk pi më, nuk shoqërohem me kriminelë – jam një vajzë e mirë”. tha ajo. Sipas disa raportimeve të mediave lokale, djali i bosit ishte bërë xheloz për dhuratat e shtrenjta që e reja merrte nga ndjekësit e saj.
Për momentin, djali i bosit, Francisco Álvarez, dhe vrasësi me pagesë përgjegjës për vrasjen e Valerias janë ende të lirë.
R-1 akuzohet gjithashtu se ka urdhëruar vrasjen e kryetarit të bashkisë së Uruapanit, Carlos Manzo. Kryetari u vra gjatë festimeve të Ditës së të Vdekurve, më 1 nëntor 2025, ndërsa festonte me familjen e tij.
Një vrasës me pagesë – që thuhet se ishte 17 vjeç – e qëlloi atë pas shpine para qindra njerëzve, përfshirë fëmijë. Autori u vra nga truprojat e kryetarit, ndërsa vetë kryetari ndërroi jetë pak kohë më pas në spital.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje