.png)
Nga Gazeta ‘Si’- Presidenti Donald Trump po kërcënon të bllokojë Ngushticën e Hormuzit- një rrugë detare jetike që ai vetë ka kërkuar vazhdimisht të rihapet pa kushte.
“Me efekt të menjëhershëm, Marina e Shteteve të Bashkuara, më e mira në botë, do të nisë procesin e Bllokimit të çdo anijeje që përpiqet të hyjë ose të dalë nga Ngushtica e Hormuzit,” shkroi Trump të dielën në mëngjes në Truth Social.
“Në një moment do të arrijmë te formula ‘Të gjithë hyjnë, të gjithë dalin’, por Irani nuk e ka lejuar këtë.”
Vendimi i Iran për të kufizuar kalimin e cisternave të naftës ka shkaktuar dëme të mëdha ekonomike për vendet që varen nga nafta e Lindjes së Mesme dhe ka shtyrë çmimet lart në mbarë botën -përfshirë edhe në SHBA.
Pra, pse do të donte Trump të bllokonte pikërisht ngushticën që thotë se duhet rihapur?
Në fakt, ngushtica nuk është teknikisht e mbyllur- Irani ka lejuar gradualisht kalimin e disa cisternave kundrejt një tarife që arrin deri në 2 milionë dollarë për anije.
Më e rëndësishmja, gjatë luftës Irani ka lejuar edhe eksportet e veta të naftës: deri në mars kishte eksportuar mesatarisht 1.85 milion fuçi naftë në ditë- rreth 100 mijë më shumë se në tre muajt e mëparshëm.
Duke bllokuar ngushticën, Trump mund t’i presë Iranit një burim kyç financimi për qeverinë dhe operacionet ushtarake.
Por kjo është një levë që administrata ka hezituar ta përdorë: nëse ngushtica bllokohet, edhe për naftën iraniane, çmimi global i naftës mund të shpërthejë.
Pikërisht për këtë arsye Marina amerikane deri tani ka lejuar cisternat iraniane të kalojnë. Çdo fuçi që del nga rajoni ndihmon sadopak në frenimin e çmimeve.
Madje, SHBA i dha Iranit në mars një licencë të përkohshme për të shitur naftën që kishte mbetur në cisterna.
SHBA e ka sanksionuar naftën iraniane me ndërprerje prej dekadash, dhe administrata Trump i kishte bllokuar shitjet që kur u tërhoq nga marrëveshja bërthamore në vitin 2018.
Por heqja e përkohshme e sanksioneve muajin e kaluar liroi rreth 140 milionë fuçi- sasi që mjafton për të mbuluar kërkesën botërore për rreth një ditë e gjysmë.
Megjithatë, kjo lëvizje pati kosto politike: praktikisht i dha Iranit mundësinë të financojë luftën përmes shitjes së naftës. Dhe Irani përfitoi shumë, duke e shitur me çmim më të lartë se standardi ndërkombëtar Brent.
Rritja e çmimeve të karburantit e ka vënë administratën Trump nën presion për ta mbyllur luftën sa më shpejt.
Lirimi i rezervave strategjike dhe lehtësimi i përkohshëm i eksporteve iraniane e ruse i dhanë pak kohë.
Tani, Trump po rrezikon të çojë edhe më lart çmimet e naftës dhe gazit për të rritur presionin maksimal ndaj Iranit që të ndalë luftën./ CNN
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje