.png)
Qeveria e Trumpit ndaloi bashkëpunimin e kompanisë Anthropic me agjencitë federale dhe e konsideroi si rrezik për zinxhirin e furnizimit, për shkak se kompania nuk pranoi të lejonte përdorimin e plotë të modeleve të saj AI nga ushtria për armë autonome dhe mbikëqyrje masive.
Ndërkohë, rivalja e saj, OpenAI ka arritur një marrëveshje me Departamentin e Mbrojtjes për të përdorur modelet e saj në ambiente të klasifikuara, duke marrë status që më parë mbahej vetëm nga Anthropic.
Presidenti Trump urdhëroi çdo agjenci federale të ndalojë menjëherë përdorimin e teknologjisë së Anthropic, duke dhënë një periudhë kalimi gjashtëmuajshe dhe paralajmëruar pasoja civile dhe penale nëse kompania nuk bashkëpunon. Arsyeja kryesore ishte refuzimi i Anthropic për të lejuar përdorimin e plotë të modeleve për të gjitha rastet ligjore, duke mos rënë dakord për armë autonome dhe mbikëqyrje masive.
Departamenti i Mbrojtjes emëroi Anthropic një “rrezik për zinxhirin e furnizimit,” një masë që zakonisht përdoret për kompani nga shtete armike, duke kufizuar aftësinë e saj për të punuar me kontraktorë të tjerë qeveritarë. Kjo mund të ndikojë partnerët dhe investitorët si Nvidia, Amazon dhe Google.
Anthropic tha se do të sfidonte çdo emërim për rrezik të zinxhirit të furnizimit në gjykatë. “Ne besojmë se ky emërim do të ishte ligjërisht i paqëndrueshëm dhe do të krijonte një precedent të rrezikshëm për çdo kompani amerikane që negocion me qeverinë,” tha kompania në një deklaratë.
Anthropic u themelua në 2021 nga Dario Amodei dhe studiues të tjerë që ndjenin se OpenAI po lëshonte parimet e sigurisë për të rritur biznesin e saj. Kompanitë rivale kanë mbledhur secila miliarda dollarë në javët e fundit, kanë vlerësime të mëdha dhe po përgatiten për oferta publike fillestare.
Ekspertët e AI dhe sigurisë thanë se veprimet e administratës mund të kenë një efekt frikësues për bizneset e tjera që po konsiderojnë të punojnë me Pentagonin ose agjenci të tjera.
“Kjo është një ditë e errët në historinë e AI në Amerikë. Mesazhi për komunitetin e biznesit dhe për vendet e tjera në botë nuk mund të ishte më i keq,” tha Dean Ball, ish-këshilltar për AI në administratën Trump dhe tani studiues i lartë në Foundation for American Innovation. Ai kishte kërkuar që administrata të mos përdorte emërimin për rrezik të zinxhirit të furnizimit.
Ball tha se partnerët dhe investitorët e Anthropic, përfshirë Nvidia, Amazon dhe Google, mund të detyrohen të tërhiqen nga kompania ose të ndalojnë bashkëpunimin nëse duan të vazhdojnë të punojnë me Pentagonin. Disa analistë ligjorë thanë se kjo u referohet vetëm punëve që kompanitë bëjnë me ushtrinë, jo gjithë biznesit privat.
Anthropic tha se në deklaratën e saj, se kjo do të ndikojë vetëm në klientët e saj në bashkëpunimin me Pentagonin.
Kontrata e Anthropic me Pentagonin është deri në 200 milionë dollarë, po aq sa kontratat e OpenAI dhe xAI.
Veprimet e Departamentit të Mbrojtjes janë shembulli i fundit i qasjes së pazakontë të administratës Trump ndaj sektorit privat dhe mund të ndikojë seriozisht në përdorimin e AI nga qeveria federale.
Problemet lindën edhe për shkak të përpjekjeve të Anthropic për të mbajtur kontroll teknik mbi përdorimin e modeleve në operacione ushtarake, si pas sulmit në Venezuelë. OpenAI, nga ana tjetër, po punon për të ruajtur masa sigurie ndërsa merr autorizim për përdorim të klasifikuar./WSJ
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje