.png)
Gazeta Si – Qeveria e Londrës do të mbështetet në Inteligjencën Artificiale për të parashikuar sjelljen e fëmijëve, siç raporton “The Times”.
Në mënyrë specifike, Inteligjenca Artificiale do të përpiqet të identifikojë të miturit që janë më të rrezikuar nga përfshirjen në aktivitete kriminale, duke përdorur dhe krahasuar të dhënat ekzistuese që aktualisht janë nën kompetencën e autoriteteve dhe departamenteve qeveritare. Për të parandaluar që Inteligjenca Artificiale të krijojë geto sociale, do të vendosen standarde etike.
Një krahasim i të dhënave – “Po shohim se si mund ta përdorim më mirë Inteligjencën Artificiale për të parashikuar kriminelët e ardhshëm dhe do ta bëjmë këtë në mënyrë etike dhe morale”, tha një burim qeveritar për “Times”.
Kjo përfshin sigurimin që të dhënat nga shërbimi shëndetësor, shërbimet sociale, policia dhe ministritë e punës dhe arsimit, të përdoren në mënyrë efektive.
“Duke përdorur Inteligjencën Artificiale, mund të shkojmë shumë përtej asaj që bëjmë aktualisht”, theksoi burimi qeveritar.
“Vazhdojmë të marrim të njëjtat profile kriminale në sistemin e drejtësisë, por ndërhyjmë shumë vonë. Kjo nuk ka të bëjë me kriminalizimin e njerëzve, por me sigurimin që paralajmërimet të kuptohen më mirë: modelet e bazuara në Inteligjencën Artificiale mund ta bëjnë këtë shumë më mirë”, tha burimi.
Tendencat kriminale – Sipas disa hulumtimeve akademike, tendencat kriminale, mund të dalin nga të dhënat shëndetësore të mbledhura tek të porsalindurit.
Megjithatë, është e paqartë nëse programi i Ministrisë së Drejtësisë do të shtrihet në mbledhjen dhe analizimin e të dhënave që nga ditët e para të jetës së një fëmije.
Sidoqoftë, fëmijët e identifikuar nga sistemi do t’i nënshtrohen programeve të mbështetjes dhe parandalimit.
Cilët janë në rrezik? – Sipas të dhënave, fëmijët që kanë kaluar nëpër kujdesin familjar, që po përjetojnë përjashtim nga shkolla ose probleme të shëndetit mendor, si dhe ata nga pakicat etnike, përfaqësojnë një përqindje të lartë të atyre që bëhen më shpesh kriminelë.
Tridhjetë e tre përqind e fëmijëve që kanë kaluar nëpër kujdesin familjar përfundojnë në probleme me ligjin, krahasuar me 4% të të tjerëve. Po kështu, të huajt e rinj përfundojnë në burg më shpesh sesa ata që kanë lindur dhe janë rritur në Angli.
Standardet etike – Për të parandaluar që inteligjenca artificiale të bjerë në getoizim racor ose social, është krijuar një komitet këshillimor për të ndihmuar në vendosjen e standardeve etike dhe operacionale.
Profesori i psikologjisë në Universitetin e Leeds, Mark Mon-Williams, shpjegoi se kjo përfshin “të kuptuarit se si bashkëveprojnë shëndetësia dhe arsimi, kujdesi social, sistemi i drejtësisë dhe mjedisi dhe si mund t’i identifikojmë fëmijët që janë pak nën pragun e shqetësimit në radarin e shërbimeve të ndryshme”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje