.png)
Gazeta Si – Tetë persona janë arrestuar mëngjesin e kësaj të marte pas arratisjes së Altin Ndocit një ditë më parë nga Spitali i Durrësit, ku ndodhej për mjekim.
Më konkretisht, në pranga ranë, zv.shefi i Policisë së Burgut të Durrësit, Dezdemon Pazaj, 5 policët që shoqëronin të arratisurin: Dorian Saraçi, Sali Ferollari, Preng Marvataj, Fation Baçi dhe kryeinfermieri i burgut, Aulon Çuko.
Operacioni është zhvilluar nga Drejtoria e Përgjithshme e Burgjeve, e cila ka nisur edhe një hetim për sqarimin e plotë të rrethanave se si u arratis 38-vjeçari Altin Ndoci.
Përveç 5 policëve që shoqëruan Ndocin nga qelia në Spitalin e Durrësit, në pranga ka rënë edhe një grua, Violeta Uka, personel i shërbimit të brendshëm.
Policët akuzohen se nuk kanë zbatuar detyrën, duke mos i vendosur prangat Ndocit në momentin e shoqërimit.
Të martën pas ngjarjes, u pezullua gjithë zinxhiri komandues i burgut të Durrësit. Mes tyre, edhe drejtori i burgut, Indrit Cerloj, shefi i Policisë dhe zyrtarë të tjerë.
Janë pezulluar po ashtu edhe punonjësit e stafit mjekësor dhe efektivët që e shoqëronin Ndocin.
Ngjarja ndodhi mesditën e djeshme kur Altin Ndoci, i akuzuar për një sërë veprash të rënda penale, përfshi vrasje dhe pjesëmarrje në organizatë kriminale, u arratis ndërsa shoqërohej për një vizitë mjekësore në spitalin e Durrësit.
Sipas Drejtorisë së Përgjithshme të Burgjeve, ai ishte shoqëruar në spital në repartin infektiv, i cili ka edhe një pavion sigurie për të dënuarit.
Policët që e shoqëronin i thanë grupit hetimor se Ndoci, pasi ka kryer vizitat në spital, ka kërkuar të shkojë në tualet.
Në momentin që ata i kanë hequr prangat, ai i ka shtyrë policët dhe është përleshur me ta, e më pas ka mundur të largohet me vrap.
Në përpjekje për ta ndaluar, mësohet se Fatjon Baçi, polici që shfaqet në foto, ka nxjerrë pistoletën dhe ka qëlluar në ajër.
Por tentativa e tij ka rezultuar e pasuksesshme, pasi Ndoci ka mundur të largohet. Sipas burimeve, në dalje të spitalit Ndocin e priste një makinë tip “Audi A7”, me të cilën ka mundur të largohet.
Nga hetimet, del se targat e automjetit që u përdor për arratisjen e Altin Ndocit nga Spitali i Durrësit rezultojnë të denoncuara si të vjedhura pak ditë më parë.
Tashmë pritet që të vazhdojnë hetimet, në drejtim të zbulimit të identitetit të personave, që e kanë ndihmuar Ndocin të arratiset, pasi dyshohet se ka qenë një plan i mirë-organizuar.
Altin Ndoci konsiderohet nga autoritetet si një person me rrezikshmëri të lartë shoqërore. Ai ka qenë arrestuar në vitin 2020 dhe prej atëherë mbahej i paraburgosur në burgun e Durrësit.
Fillimisht ai u arrestua për dy ngjarje të rënda kriminale me katër të vrarë, konkretisht ekzekutimin e Anxhelo Avdiajt dhe Dorian Shkozës, si dhe dy vëllezërve Viktor e Besmir Haxhia në Durrës.
Por këto akuza nuk u provuan dhe 39-vjeçari arriti të fitojë pafajësinë pas disa vitesh.
Së fundmi, ai u dërgua për gjykim nga SPAK në tetor 2025, si pjesë e organizatës kriminale për të cilën akuzohen vëllezërit Çopja.
Ndoci është identifikuar nga të penduar të drejtësisë si pjesëmarrës në disa atentate në luftën mes grupeve kriminale në vend.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
