.png)
Nga Gazeta “SI”- Më 26 nëntor, Teatri Kombëtar i Operas, Baletit dhe Ansamblit Popullor mirëpret për herë të parë në Shqipëri një nga ansamblet më të njohura të muzikës korale botërore: Czech Boys – Boni Pueri.
Vetëm një ditë më pas, më 27 nëntor, këta zëra të jashtëzakonshëm do të ngjiten në skenën e Teatrit “Petro Marko” në Vlorë, duke sjellë për publikun vlonjat një përvojë artistike të rrallë.
“Boni Pueri”, me 35 djem të talentuar, do të dhurojë një koncert plot ngjyra dhe energji rinore. Nën drejtimin e maestro Pavel Horák dhe me shoqërimin në piano të Vartan Agopian, ansambli sjell një program të përzgjedhur nga repertori koral ndërkombëtar. Ky koncert premierë e pasuron kalendarin kulturor të TKOBAP-së dhe ofron një përvojë unike për publikun shqiptar.
I themeluar në vitin 1982, kori i djemve Boni Pueri mbetet një nga ansamblet më të shquara të Evropës, duke vazhduar traditën e një kori që daton që prej vitit 1252 në Kapitullin Metropolit të Shën Vitusit në Pragë. Me rreth 200 anëtarë të moshave 4–19 vjeç, kori ka interpretuar më shumë se 3,000 koncerte në mbarë botën.
Turnetë e tyre kanë përfshirë Japoni, SHBA, Kanada, Korenë e Jugut, Kinën, shumë vende të Evropës dhe Vatikanin. Ata kanë kënduar në skena prestigjioze si Concertgebouw në Amsterdam, National Centre for the Performing Arts në Pekin, Grace Cathedral në San Francisko dhe Basilica Santa Maria Maggiore në Romë.
Boni Pueri ka qenë pjesë e ceremonive shtetërore të nivelit të lartë, përfshirë nderimin e Sir Nicholas Winton dhe vizitat zyrtare të presidentëve Joachim Gauck, Heinz Fischer dhe Xi Jinping. Kori ka performuar krah emrave të mëdhenj si José Carreras, Bobby McFerrin dhe Thomas Hampson, ndërsa mbi 30 albumet e tyre mbeten referenca të rëndësishme në botën e muzikës korale.
Repertori i tyre shtrihet nga muzika e shenjtë te ajo bashkëkohore, përfshirë kryevepra të Mahlerit, Bachut, Mozartit, Fauré-së dhe Handelit. Ata kanë kontribuar në rizbulimin e kompozitorëve çekë të epokës baroke dhe klasike, si Fischer, Vejvanovský, Zelenka, Wanhal dhe Tomášek. Po ashtu janë aktivë në premierat moderne dhe muzikën filmike ndërkombëtare.
Si pjesë e një shkolle të dedikuar për edukimin vokal të djemve , e vetmja e këtij lloji në Republikën Çeke , Boni Pueri është vlerësuar me titullin Ambasador Kulturor i Evropës nga Federata Evropiane e Korëve.
Vizita e tyre në Shqipëri, më 26 nëntor në TKOBAP dhe më 27 nëntor në Vlorë, premton dy mbrëmje të paharrueshme muzikore, që sjellin traditën më të çmuar korale çeke përpara publikut shqiptar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
