.png)
Nga Gazeta ‘SI’ – Partia Demokratike ka shprehur një qëndrim të ashpër kundër dy projektligjeve të qeverisë për faljen e detyrimeve dhe paqen fiskale, duke i cilësuar ato si një goditje direkte ndaj bizneseve të ndershme dhe një ndihmë për evazorët fiskalë.
Në një deklaratë për mediat, deputeti Eno Bozdo foli mbi projektligjet e fundit të miratuara nga qeveria për faljen e detyrimeve dhe “Paqen Fiskale”, ku u shpreh se këto nisma dëmtojnë rëndë bizneset e ndershme dhe favorizojnë evazionin fiskal dhe pastrimin e parave të pista.
Bozdo thotë se PD a kërkuar emrat e kompanive që përfitojnë nga Paqja, por Ministria e Financave nuk ia vuri në dispozicion.
“Kërkesës së deputetëve të Partisë Demokratike dhe opozitës për emrat e kompanive që përfitojnë më shumë nga kjo falje, Ministri i Financave iu përgjigj se këto emra nuk i kishte.
Konstatimit të deputetëve të Partisë Demokratike se kjo falje prej 2 miliardë eurosh dëmton rëndë të gjitha bizneset e ndershme që paguajnë deri në taksat dhe tatimet, dhe se praktikisht është një ftesë e hapur për cilindo biznes të bëjë sa më shumë evazion dhe korrupsion në pritje të amnistisë së radhës, përfaqësuesi i qeverisë nuk dha asnjë shpjegim.
Pyetjes tjetër të deputetëve opozitarë, nëse ndër përfituesit e kësaj amnistie ka persona që vazhdojnë të marrin tendera apo prokurime publike sepse nuk shkon që hajduti të marrë përsëri financim nga paratë publike përsëri përfaqësuesi i qeverisë nuk u përgjigj.
Kontrolli i Lartë i Shtetit, në raportin e tij vjetor për vitin 2024, konstaton se administrata tatimore dhe ajo doganore ka bërë fare pak përpjekje për të rikuperuar këtë borxh. KLSH konstaton se në tatime gjatë vitit 2023 ky borxh u rrit me 400 milionë euro. Pra, u falën praktikisht 400 milionë euro në vitin elektoral 2023, por për këtë çështje nuk morëm asnjë shpjegim”, sqaroi Bozdo.
Deputeti demokrat akuzoi se nga marrëveshja për tatimin me 18%, po ashtu në kuadër të Paqes, ndërtuesit janë përfituesit kryesor dhe kjo do të bëhet precedent për evazion fiskal.
“Ndërkaq, projektligji tjetër, ai i ‘Paqes Fiskale’, miraton një mekanizëm ku një biznes, nëse deklaron paraprakisht për vitin 2026 një fitim 18% më të madh se ai i vitit të shkuar, për çdo fitim mbi 18% do të taksohet me vetëm 5%, dhe jo me normën e zakonshme të tatimit. Kjo është një pabarazi dhe aspak e ndershme, sepse ky mekanizëm hap jo thjesht një rrugë, por një autostradë të tërë për evazion fiskal.
Veçanërisht bizneset që operojnë në sektorë si ndërtimi e kanë shumë të thjeshtë të përfitojnë nga kjo skemë, duke fshehur fitimet dhe ulur artificialisht taksat që duhet të paguajnë. Ky është sektori ku paratë e pista qarkullojnë dhe ku qeveria mbyll sytë për pastrimin e këtyre parave në dhjetëra kulla shumëkatëshe që po jepen dhe do të jepen për ndërtim kudo në Shqipëri”, tha Bozdo nga selia e Kuvendit.
Ai kritikoi mungesën totale të transparencës nga ana e qeverisë dhe theksoi se qëllimi i deklaratës së tij është të ndërgjegjësojë publikun dhe të bëjë thirrje për reagim ndaj këtyre praktikave që, sipas tij, penalizojnë biznesin e ndershëm dhe forcojnë interesat e evazorëve.
“Të dy projektligjet, ai i “Faljes së Detyrimeve” dhe ai i “Paqes Fiskale”, kanë mungesë totale transparence, papërgjegjshmëri në propozimin e tyre dhe dëmtojnë, në vend që të rregullojnë, klimën e biznesit në vend. Ato penalizojnë biznesin e ndershëm, vetëm sepse administrata e patronazhistëve nuk ka dashur t’i mbledhë këto detyrime, siç e shpreh KLSH në raportin e saj për vitin 2024.
Projektligjet i kanë dalë krahë evazorëve fiskalë, hajdutëve të parave të shqiptarëve, që me bekimin e qeverisë pastrohen prej 2 miliardë eurosh nga borxhi më i madh i krijuar ndonjëherë ndaj shtetit.
Partia Demokratike është kundër kësaj pakete fiskale dhe u bën thirrje të gjithë bizneseve të ndershme të reagojnë ndaj kësaj padrejtësie”, përfundoi deputeti demokrat.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
