.png)
Nga Gazeta Si- Tejlor Tivari është autori i ngjarjes në Durrës, ku u gjet i vdekur 51-vjeçari Valbon Beqiri.
Ai është arrestuar ditën e sotme, disa orë pas ngjarjes.
Sipas dëshmisë së tij në polici, viktima ka tentuar ta përdhunojë dhe ai është vetëmbrojtur duke e goditur me thikë.
“Me 51-vjeçarin ishim miq. Më thirri në banesën e tij dhe shkova për të pirë një gotë birrë. Pas bisedës 51-vjeçari tentoi të në përdhunonte. Tentova të mbrohesha, ai ishte më i fuqishëm se unë, i shpëtova, mora thikën e bukës dhe e qëllova”, ka thënë autori, duke shtuar se u përlesh me të pasi viktima nuk e lejonte të largohej.
“Jam larguar i tronditur nga vendi i ngjarjes, nuk e mendoja se ai do të vdiste”, ka deklaruar përpara autoriteteve 24-vjeçari.
Ndërkohë, në një njoftim për median, policia thotë se Tivari kishte hyrë në banesën e 51-vjeçarit për të blerë lëndë narkotike.
“Gjatë komunikimit dhe qëndrimit, 24-vjeçari dyshohet se, për motive të dobëta, është konfliktuar me 51-vjeçarin dhe gjatë konfliktit, e ka goditur me thikë në pjesë të ndryshme të trupit, duke i shkaktuar vdekjen e menjëhershme”, thotë policia.
Pas ngjarjes, i dyshuari është larguar nga vendi i ngjarjes, duke u ndihmuar nga Xh. D., 27 vjeç, i cili, me një taksi, e ka dërguar fillimisht në banesën e tij.
Rreth orës 19:30, shërbimet e Policisë u njoftuan se në një banesë në lagjen nr. 12 të qytetit ishte gjetur pa shenja jete Valbon Beqiri, i njohur edhe me emrin Marko Beqiri, 51 vjeç, baba i një djali.
Nga ekspertiza paraprake mjekoligjore, rezultoi se viktima kishte shenja dhune dhe plagë të shkaktuara me thikë, të cilat dyshohet se i kanë shkaktuar vdekjen.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
