.png)
Gazeta Si – Jetmir Llani është arrestuar këtë të hënë nga forcat RENEA, pasi dyshohet se i vendoste gjoba biznesve në qytetin e Lezhës.
Sipas njoftimit të policisë, bëhet me dije se Llani në bashkëpunim me tre persona të tjerë u vendosnin gjoba bizneseve, duke ushtruar presion dhe kërcënuar me armë.
RENEA, në bazë të kontrolleve të kryera, sekuestroi 1 armë gjahu, municion luftarak dhe 2 automjete të blinduara, të cilat përdoreshin për të kryer këtë veprimtari.
Vite më parë 46-vjeçari ka qenë në burg për vrasje, pasi u hakmor për djalin e tij 9-vjeçar, Indrit Llani, i cili u vra më 5 qershor të vitit 2012.
Jetmir Llani u dënua me 25 vite burgim nga Shkalla e Parë, por Apeli e uli, ndërsa mësohet se prej disa muajsh ka kryer dënimin dhe ndodhej në liri.
Në 5 qershor 2012, ndodhi një përplasje ndërmjet familjeve Shkreta dhe Llani, ku mbeti i vrarë Indrit Llani, ku nisi dhe saga hasmërinë mes dy fiseve.
Jetmir Llani humbi djalin e tij të vogël, Indritin, ndërsa i vëllai u plagos kur mesditën e 5 qershorit djaloshi së bashku me të vëllanë, kushërirën, nënën e tij dhe xhaxhanë po udhëtonin me makinë.
Vëllezërit Altin dhe Vladimir Shkreta akuzohen se i kanë dalë para makinës dhe kanë qëlluar me breshëri automatiku.
Pak ditë më vonë të qershrorit 2012, policia arrestoi autorët, ndërsa më 19 korrik plumbat i morën jetën Mark Shkretës, 71 vjeç babait të vëllezërve Altin dhe Vladimir.
Vrasja u shënua në rrugën “Hoxha Tahsim” në Tiranë dhe policia akuzoi Jetmir Llanin si autorin e dyshuar.
Jetmir Llani dhe vëllai i tij Muharrem Llani u dënuan me nga 25 vite burg. Dyshohet se Jetmir Llani ka qenë i dyshuar edhe për atentatin në fshatin Shpërdhet të Fushë Mamurras ndaj Gentian dhe Emanuel Shkretës, djemve të 71-vjeçarit të ekzekutuar, Mark Shkreta. Ngjarja ndodhi në nëntor 2012, ndërsa humbi jetën Gentian Shkreta.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
