Melsi Qirici emërohet Drejtoreshë e Teatrit të Kukullave dhe Qendrës Kombëtare të Kulturës për Fëmijë

Nga Gazeta 'Si'-Melsi Qirici, një figurë e njohur dhe me përvojë të gjatë në fushën e medias dhe kulturës, është emëruar si drejtoreshë e re e Teatrit të Kukullave dhe Qendrës Kombëtare të Kulturës për Fëmijë (QKKF). Më përpara këtë post e mbante aktori i mirënjohur Agim Bajko, që tashmë del në pension.

E lindur më 9 dhjetor 1980 në Korçë, Qirici u diplomua për Letërsi Shqipe në Fakultetin Histori-Filologji të Universitetit të Tiranës në vitin 2004. Karriera e saj 23-vjeçare në media ka përfshirë punë në median e shkruar dhe atë vizive.

Në fillim të karrierës së saj, Qirici ishte kryeredaktore e revistës për fëmijë "Albas" dhe më pas e revistës për të rinj "Trendy", e vetmja e këtij lloji në Shqipëri dhe ndër më të shiturat në vitet 2004-2008. Gjatë periudhës 2000-2008, ajo ka qenë aktive në botime për fëmijë, përkthime, redaktime dhe krijime artistike, shumë prej të cilave janë përfshirë në kurrikulën mësimore të shkollave fillore.

Në vitin 2008, Qirici filloi punën në televizion, duke kontribuar në programe të njohura të Top Channel si kryeredaktore dhe autore. Ajo ka krijuar dhe menaxhuar disa programe për fëmijë dhe të rinj në TCH, Digitalb, dhe RTSH, duke përfshirë "The Voice of Albania", "Albanians Got Talent", "MasterChef Junior" dhe "Fëmijët e Dinë më Mirë".

Nga viti 2016, Qirici ka shërbyer në Radio Televizionin Shqiptar (RTSH), fillimisht si kryeredaktore e kanalit të parë gjeneralist RTSH1 dhe më pas si Drejtuese e Njësisë së Programeve. Gjatë kësaj kohe, ajo ka spikatur për energjinë krijuese dhe dedikimin maksimal në krijimin e një platforme të pasur televizive për fëmijë dhe të rritur.

Ajo ka kryer një sërë trajnimesh dhe kualifikimesh, përfshirë menaxhimin e burimeve njerëzore në media, trajnim për gazetari televizive në RAI, dhe trajnime për patenta televizive ndërkombëtare.

Në rolin e saj të ri, Qirici synon të implementojë një program gjithëpërfshirës për QKKF dhe Teatrin e Kukullave, duke organizuar aktivitete dhe gjini artistike që të tërheqin jo vetëm fëmijët, por edhe të rinjtë, duke i bërë pjesë interaktive të veprimtarive. Ndër projektet kryesore të saj është ndërtimi i një kalendari artistik edukues dhe argëtues, si indoor ashtu dhe outdoor, me fokus në orientimin e brezave të ardhshëm drejt një arti cilësor dhe krijues.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.