Gazeta Si – Gjykata e Lartë në Dhomë Këshillimi, me gjyqtarët Ilir Panda, Sandër Simoni e Sokol Binaj, do të vendosë këtë të martë mbi dy rekurse të Sali Berishës dhe dhëndrit të tij, Jamarbër Malltezi për heqjen e masës së sigurisë “arrest në shtëpi”, si dhe për zëvendësimin e kësaj mase.
Ende nuk është caktuar një orar se kur do ta marrë vendimin trupa prej tre anëtarësh, për të cilët më herët ishte kërkuar përjashtimi nga gjykimi i çështjes nga avokatët e Berishës.
Mbrojtja e këtij të fundit pretendon në kërkesën e saj se nuk ekzistojnë kushtet dhe kriteret që Berisha të hetohet me masë sigurie.
Shqyrtimi do të bëhet në Dhomë Këshillimi, pa praninë e palëve. Javën e kaluar seancat u shtynë për shkak të kërkesës së Berishës për përjashtimin e tre anëtarëve të Kolegjit Penal, Ilir Panda, Sandër Simoni e Sokol Binaj, duke pretenduar njëanshmëri.
Kërkesat u shqyrtuan më pas nga dy gjyqtarë të lartë, që vendosën mospranimin, duke e lënë të pandryshuar trupin gjykues.
Prej 30 dhjetorit, Berisha ndodhet nën arrest shtëpie, nën hetim për korrupsion pasiv lidhur me privatizimin e Kompleksit Partizani.
SPAK thotë se Berisha ka kryer veprime konkrete, si kryeministër, me miratime ligjesh dhe aktesh nënligjore, nga të cilat përfitoi dhëndri i tij, përmes privatizimit të pronës shtetërore, kompleksi sportiv Partizani. Berisha i ka hedhur poshtë akuzat si të pabaza, duke i cilësuar si sulme politike të kryeministrit Edi Rama.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
