.png)
Në një panel të Forumit të Dubrovnikut, ku kanë marrë pjesë diplomatë të rajonit përfshirë edhe Emisarin e BE-së Miroslav Lajçak dhe Ndihmës Sekretarin për Evropën dhe Eurazinë James O’Brien, Kryediplomati shqiptar Igli Hasani është përplasur me daklarata me Mirosllav Lajçak i cili është Përfaqësues i Posaçëm i BE-së për Ballkanin Perëndimor dhe emisar për dialogun Kosovë-Serbi
I pyetur nga moderatori gazetari Michael Martens nëse procesi i anëtarësimit në BE është një proces i bazuar në merita, Hasani ka adresuar kritika duke thënë se “forcat centripetale drejt BE-së duhen rritur” dhe se Shqipëria do të vazhdojë t’i përmbushë kriteret e kërkuara dhe “se këtë nuk e bën për shkak të BE-së por për shkak të vetë Shqipërisë”.
“Kam vështirësi të kuptoj se vendi im e ka organizuar vetëm një konferencë ndërqeveritare (Shqipëri-BE), dhe poashtu edhe të tjerët e kanë bërë këtë. Kaq”, ka thënë ai. Kryediplomati Hasani i është referuar konferencës së parë Shqipëri-BE të vitit 2022, për çeljen e negociatave. Ndaj kësaj ka reaguar Lajçak.
“Ndihem i obliguar që të përgjigjem për pyetjen që iu bë ministrit Hasani. Dua të them se ky proces është absolutisht i bazuar në merita. Ka shumë politikë dhe gjeopolitikë në fazën pëtgatitore, vendimi për të dhënë statusin e kandidatit, ftesa për hapjen e negociatave për anëtarësim, por pasi të jeni në proces të anëtarësimit, ju duhet të pëtmbushni kriteret, s’ka rrugë të shkurtër”, ka thënë Lajçak.
Por, ndaj këtij konstatimi ka reaguar menjëherë kryediplomati shqiptar. “Nuk thashë asnjëherë rrugë të shkurtra. Megjithë respektin, ju jeni për dialogun Beograd-Prishtinë. Kështu që dua të jem i qartë në një gjë. S’kemi kushte për kushtet që na janë vënë. Le të jem i qartë për këtë”, ka thënë Hasani. Lajçak reagoi përsëri duke thënë: “Nuk jam duke polemizuar me ty Igli”. I menjëhershëm ishte reagimi i Hasaniit i cili në mënyrë të drejtëpërdrejtë i kërkoi që të merret me dialogun Kosovë-Serbi, madje me ironi duke i përmendur rezultatet.
“Po, po, por rri te dialogu. Do të jemi të lumtur nëse ke ndonjë rezultat, do të mbështesim, do të mbështesim vazhdueshëm sic kemi bërë… por rri te dialogu”, tha Hasani. Sllovaku iu përgjigj duke thënë se “mandati im është më i gjerë se dialogu, cështjet rajonale”. Hasani vazhdoi: “Po, por ndalu te dialogu”. Nuk mungoi as përgjigja e Lajçak me çka u mbyll polemika e shkurtër dhe intensive mes dy protagonistëve: “Po ashtu kam një eksperincë personale 25 vjecare që s’mund ta injorojë. Kam qenë pjesë e ketij procesi të vendit tim, Ballkanit Perëndimor dhe guxoj të them se di diçka për këtë”, tha Lajçak.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
