Nga Gazeta ‘Si’- Donald Trump doli sot(31 maj) në një konferencë për shtyp pasi u shpall fajtor për 34 akuza. Ai e konsideroi gjyqin si të padrejtë.
Përpara se t’i drejtohej temës së përhapur të emigracionit dhe të fajësonte Biden, Trump e nisi fjalimin e tij duke e përshkruar shpalljen fajtor si një pararojë të gjërave të këqija që do të vijnë.
“Ky është një rast ku, nëse mund të ma bëjnë këtë mua, ata mund t'ia bëjnë këtë kujtdo,” tha ish-presidenti.
"E gjitha kjo po bëhet nga Biden dhe njerëzit e tij”
Trump deklaroi se ishte i bindur që e gjithë kjo po bëhet nga Biden dhe njerëzit e tij.
Ai tregoi se ai ishte nën një urdhër të rremë, për të cilin tha se ishte faji i Biden dhe departamentit të drejtësisë – megjithëse urdhri në fakt ishte vendosur nga gjyqtari i Nju Jorkut, Juan Merchan. Trump shtoi se Biden ishte shkaku i problemeve të tij:
“Unë jam kandidati kryesor. Sa për ta kuptuar, e gjithë kjo është bërë nga Biden dhe njerëzit e tij. Nuk e di nëse Biden di shumë për këtë por ai është megjithatë presidenti, kështu që ne duhet të përdorim emrin e tij. Këtë po e bën Uashingtoni dhe askush nuk ka parë ndonjëherë diçka të tillë”, deklaroi Trump.
“Do apeloj vendimin e jurisë”
Ndërsa pretendoi se gjyqi ishte manipuluar dhe pasi foli për një kohë të gjatë për të gjitha mënyrat në të cilat ai beson se u dënua gabimisht për akuzat për mashtrim në biznes, Trump tha se do të apelonte vendimin e jurisë.
“Ne do ta apelojmë këtë mashtrim. Ne do ta apelojmë atë për shumë gjëra të ndryshme.”
Duke iu referuar gjyqtarit Juan Merchan, Trump tha: “Ai nuk na lejoi të kishim dëshmitarë, nuk na lejoi të flisnim, nuk na lejoi të bënim asgjë. Gjykatësi ishte një tiran.
Ishte një gjyq i montuar. Ne donim një ndryshim të vendit ku do të mund të kishim një gjykim të drejtë. Ne donim ndryshimin e gjyqtarit, donim një gjyqtar që nuk ishte në konflikt, dhe padyshim që ai nuk e bëri këtë ... askush nuk ka parë ndonjëherë diçka të tillë,” tha ish-presidenti.
Trump tha se 34 akuzat për falsifikimin e të dhënave të biznesit për të cilat u dënua të enjten tingëllojnë më keq se sa janë.
“Ne do ta bëjmë Amerikën të madhe përsëri”
Ndërsa fjalimi i tij po i afrohej fundit, Trump e shfaqi veten si një luftëtar për Shtetet e Bashkuara në përgjithësi.
"Unë jam i gatshëm të bëj gjithçka që duhet të bëj për të shpëtuar vendin tonë dhe për të shpëtuar Kushtetutën tonë," tha ai. “Pra, ne do të vazhdojmë luftën. Ne do ta bëjmë Amerikën të madhe përsëri.”
Ai e mbylli me:
“Mos harroni, 5 Nëntori është dita më e rëndësishme në historinë e vendit tonë. Faleminderit shumë!”
Donald Trump u bë ish-presidenti i parë që u dënua për vepra penale të enjten pasi një juri në Nju Jork e shpalli atë fajtor për falsifikimin e dokumenteve, si pjesë e një skeme për të ndikuar zgjedhjet e 2016, duke fshehur një pagesë ndaj një aktoreje të filmave pornografikë, e cila thotë se kishte patur një marrëdhënie intime me ish-Presidentin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
