Nga Gazeta 'Si'- Irani paralajmëroi sot për mundësinë e një shpërthimi të pakontrolluar konflikti në Lindjen e Mesme nëse Shtetet e Bashkuara vazhdojnë të mbështesin Izraelin në luftën e tij kundër Hamasit në Gaza.
“Për sa kohë që Amerika mbështet krimet e regjimit sionist dhe vazhdimin e luftës (…) ekziston mundësia e një shpërthimi të pakontrolluar të situatës në rajon”, tha ministri i jashtëm iranian Hossein Amir-Abdollahian gjatë një bisede telefonike me Sekretarin e Përgjithshëm të OKB-së Antonio Guterres.
Ky komunikim u zhvillua ndërsa SHBA vuri veton të premten ndaj një rezolute të Këshillit të Sigurimit që bën thirrje për një armëpushim të menjëhershëm humanitar në Gaza.
Teksti, i cili mori 13 vota pro, një kundër dhe një abstenim (MB) u hartua nga Emiratet e Bashkuara Arabe pas thirrjes së Antonio Guterres ndaj nenit 99 të Kartës së OKB-së, i cili e lejon atë të tërheqë vëmendjen e Këshillit të Sigurimit për një çështje “e cila mund të rrezikojë ruajtjen e paqes ndërkombëtare dhe sigurisë ndërkombëtare”.
“Përdorimi i nenit 99 është një veprim i guximshëm nga ana juaj për të ruajtur paqen dhe mbështetet nga opinioni publik botëror,” i tha Amir-Abdollahian Guterres. Për ministrin iranian, pretendimi i izraelitëve se Hamasi është ai që shkeli armëpushimin që përfundoi më 1 dhjetor, është krejtësisht i rremë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
