Nga Gazeta Si – Gjykata e Tiranës ka caktuar masën e sigurisë “arrest shtëpie”, për 30-vjeçaren që braktisin foshnjën e saj në garazhin e një pallati në zonën e Yzberishtit në Tiranë. Avokati i saj ka kërkuar kryerjen e një akt eskpertimi psikik, për të vlerësuar gjendjen mendore të saj.
Ngjarja e rëndë u regjistrua katër ditë më parë, kur foshnja e seksit mashkull u gjet në një divan në garazhin e pallatit. Foshnja u transportua me urgjencë në spital, por fatkeqësisht ndërroi jetë të nesërmen. Në momentin që është dërguar në reanimacion foshnja ka qenë i mbuluar me gjak e baltë.
Foshnjës i është konstatuar hipotermi e thellë, gërvishtje e syrit të majtë, të gojës, të gishtave të dorës së djathtë, të cilat u evidentuan pas larjes së bebes. Pas ngjarjes, policia arrestoi nënë 30-vjeçare e cila ka deklaruar se ishte e pamartuar dhe se kishte fshehur shtatzëninë nga familja e saj.
30 vjeçarja e ka marrë vesh në gjykatë lajmin e trishtë për ndarjen nga jeta të foshnjës së porsalindur. Në dëshminë e dhënë, ajo ka deklaruar se kishte vepruar nën presion pasi familja e saj nuk dinte asgjë për shtatzaninë si dhe i dashuri i saj e kishte braktisur në momentin që e kishte marrë vesh se ajo është shtatzënë.
“Punoj në një fabrikë këpucësh. I dashuri quhet Klodi, më ka braktisur dhe nuk është interesuar pasi mbeta shtatzënë. Më zunë dhimbjet dhe shkova te garazhi, nuk e mbaja dot sepse kisha presionin e familjarëve që nuk e pranonin pasi isha e pamartuar”, ka deklaruar 30 vjeçarja.
Nga ana tjetër, e ëma e 30 vjeçares ka deklaruar se nuk e kishin kuptuar se vajza kishte qenë shtatzënë, pasi vishte rroba të gjera.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
