Gazeta Si – Dy djem me origjinë shqiptare, respektivisht 43 dhe 21 vjeç, kanë humbur jetën në luftën që po zhvillohet në Ukrainë kundër forcave pushtuese ruse. Lajmi është bërë i ditur nga deputeti socialist dhe ish-ministri i Mbrojtjes, Pandeli Majko.
Në një postim në rrjetet sociale, Majko shkruan se është njoftuar për këtë ngjarje nga konsulli i Shqipërisë në Ukrainë, Omarov Shakrin.
Sipas deputetit socialist, djemtë me origjinë shqiptare, vinin nga radhët e disporës, dhanë jetën në krye të detyrës si heronj.
Ata ishin: Dermentli Anatoly, nga fshati shqiptar i Karakurtit (në rajonin e Odesës). Ai kishte lindur më 3 shtator të vitit 1980 dhe u mobilizua në Brigadën e mekanizuar Nr.118 në rajonin e Zaporozhias. Për fat të keq, ai humbi jetën në 15 tetor në një mision luftimi.
Ndërsa djali tjetër, është 21-vjeçari Haydarzhy Danylo, i cili u lind në një familje shqiptare në 26 janar 2002 në fshatin Georgivka (rajoni i Zaporozhias).
Ai ishte fëmija i dytë në familjen e tij, e cila aktualisht jeton ende në zonën e okupuar nga trupat ruse. Kur filloi lufta, Danylo ishte në Poloni.
Në verën e 2022, ai shkoi vullnetarisht për t’u mobilizuar, por u refuzua (për shkak të moshës).
Në vitin 2023, pas ditëlindjes së 21-të ai aplikoi sërish dhe shërbeu vullnetarisht në Forcat e Armatosura të Ukrainës.
“Ai shërbeu në njësinë ushtarake A290 dhe dha jetën në zonën e luftimeve në fshatin Liman, pranë qytetit Kupiansk, në rajonin e Kharkivit”, – thekson Majko.
Sipas deputetit socialist, të dielën (22 tetor), janë zhvilluar në qytetin e Zaporozhias, “ceremonitë funerale të dy djemve shqiptarë me gjak, të cilët edhe nga fotot personale duket që nuk kanë harruar origjinën e tyre”.
Në ceremoninë e varrimit pranë flamurit të Ukrainës është vendosur edhe flamuri kombëtar shqiptar. “I përjetshëm, qoftë kujtimi i tyre!”, – përfundon Majko.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
