.png)
Gazeta Si – Fitorja 94-89 në ‘Pepsi Center’ vlen 4-1-shin për Nuggets, që shpallen kështu kampionë të NBA-së. Majemi është dorëzuar në ndeshjen e 5-të. Shkëlqen sërish Nikola Jokiç me 28 pikë dhe 16 ribaunde. Serbi është zgjedhur lojtari më i mirë i finaleve.
Denver Nuggets festojnë dhe hyjnë në histori, Majemi pëson një tjetër humbje në NBA Finals. Ka përfunduar kështu sezoni i basketbollit amerikan, me suksesin e merituar të Jokiç me shokë, të cilët kanë siguruar unazën pas fitores 94-89 në ndeshjen e 5-të, që mbyll llogaritë në 4-1.
Basketbollisti serb bëri një ndeshje tjetër të një niveli të lartë: 28 pikë dhe 16 ribaunde. Jokiç është zgjedhur MVP i Finals, pasi i dhuroi skuadrës së tij titullin e parë kampion në histori. Rezultatet e Denver ishin fantastike: 4-1 ndaj Minesotas, 4-2 ndaj Feniks, 4-0 ndaj Lejkërs dhe 4-1 ndaj Majemit. Me këto rezultate bindëse Denver bëri të vetin titullin në NBA.
Ndeshja e fundit ishte e mbushur me kthesa të papritura, me tension dhe faza loje të luftuara. Në fillim u duk gjithçka në favor të Majemit, që në mesin e ndeshjes ishte +7 pikë, por Denver iu afrua dhe pastaj e parakaloi 1 minutë e gjysmë nga fundi.
Rezultati dhe përqindja ishin të ulëta për të dyja skuadrat, me një 5/28 për tre për Nuggets. Në atë tension ai që magjepsi ishte sërish Nikola Jokiç, lojtari që dominoi gjithë fazën e play-off-it. Suksesi i Denver vjen pas një ecurie monstruoze në play-off (16 fitore dhe 4 humbje) dhe mund të sjellë tashmë një dinasti të re në NBA.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
